औरंगाबाद : डॉ. बाबासाहेब आंबेडकर मराठवाडा विद्यापीठाच्या एक ऑक्टोबर पासून सुरु होणाऱ्या परीक्षा अनिश्‍चित काळासाठी पुढे ढकलण्यात आल्या आहेत. कुलगुरु डॉ. प्रमोद येवले यांनी मंगळवारी (ता. २९) संबंधित अधिकाऱ्यांसोबत झालेल्या बैठकीनंतर हा निर्णय घेतला आहे. शिक्षकेत्तर कर्मचारी संघटनेने २४ सप्टेंबरपासून पुकारलेल्या लेखणी बंद आंदोलनाचाच हा परिणाम आहे.

मराठवाड्यातील अन्य बातम्या वाचण्यासाठी यावर क्लिक करा..!

उच्च व तंत्रशिक्षण मंत्री उदय सामंत आणि अधिकाऱ्यांसोबत सोमवारी (ता. २८) बैठक होऊनही तोडगा न निघाल्याने संप सुरुच राहणार आहे. परिणामी राज्यभरातील विद्यापीठांनी आपल्या परीक्षा दहा दिवस पुढे ढकलल्या आहेत. यात डॉ. येवले यांनी मात्र, किती कालावधीसाठी परीक्षा पुढे ढकलण्यात आली आहे. याबाबत स्पष्टीकरण दिलेले नाही. उन्हाळी २०२० च्या परीक्षा एक ऑक्टोबरपासून निश्‍चित करण्यात आल्या होत्या. परंतु विद्यापीठातील सर्व शिक्षकेत्तर कर्मचाऱ्यांनी लेखणीबंद आंदोलन सुरु केल्यामुळे परीक्षा एक ऑक्टोबरपासून नियोजीत वेळेत सुरु करणे शक्य नसल्याचे कारण देण्यात आले आहे. नवीन वेळापत्रक स्वतंत्रपणे प्रकाशीत करण्यात येणार आहे.

औरंगाबाद जिल्ह्यातील महत्त्वाच्या बातम्या वाचण्यासाठी येथे क्लिक करा.

मंत्री सामंत यांच्यासोबत तासभर विविध प्रश्नांवर चर्चा झाली. मात्र तोडगा काही निघाला नाही. दोन महिन्यात मागण्या मान्य करु, असे मंत्री महोदय म्हणाले. तथापि शासन आदेश अथवा लेखी पत्र मिळाल्याशिवाय आंदोलन मागे घेण्यात येणार नाही, अशी भुमिका कृती समितीने घेतली आहे.

देशभरातील महत्त्वाच्या बातम्या वाचण्यासाठी येथे क्लिक करा.