अंकुशनगर : खातेदाराच्या घरात घुसून कर्जदार व त्यांच्या नातेवाईकांना शिवीगाळ व मारहाण करून घरातील वस्तूंची तोडफोड केल्याची घटना महाकाळा (ता.अंबड) येथे घडली. याप्रकरणी छत्रपती संभाजीनगर येथील इंडिया शेल्टर फायनान्स कंपनीच्या मॅनेजर व सहकाऱ्यांवर गोंदी पोलिस ठाण्यात गुन्हा दाखल करण्यात आला आहे.

कृष्णा वासुदेव लाड (रा.महाकाळा) यांनी मागील दीड वर्षापूर्वी त्यांनी घर बांधकामासाठी इंडिया सेल्टर फायनान्स, (खाजगी कंपनी) छत्रपती संभाजीनगर यांच्याकडून ९ लाख रुपये कर्ज घेतले होते. बँकेचे मॅनेजर किरण देवकाते यांच्याकडे लाड यांनी नोव्हेंबर २०२३ पर्यंत रितसर हप्ते भरले आहेत.

परंतु, ४ डिसेंबरला दुपारी साडेतीन वाजेच्या सुमारास फायनान्स बँकेचे मॅनेजर किरण देवकाते, गौतम उबाळे व रोहिणी ठोंबरे यांनी कृष्णा लाड यांच्या चुलत्याला फोन करुन सांगितले की, तुमचा पुतण्या कृष्णा वासुदेव लाड यांनी घेतलेले कर्जाचे हप्ते भरा, असे म्हणताच त्यांनी सांगितले की, नोव्हेंबर २०२३ पर्यंत तुमचे रितसर हप्ते भरलेले आहे. या पण, हप्त्याची पण व्यवस्था करतो,असे सांगितले.

परंतु, सायंकाळी साडेपाच वाजेच्या सुमारास छत्रपती संभाजीनगर येथून इंडिया सेल्टर फायनान्स (खाजगी कंपनी) बँकेचे मॅनेजर किरण देवकाते, गौतम उबाळे व रोहिणी ठोंबरे व इतर एक अनोळखी व्यक्तींनी महाकाळा येथे येत शिवीगाळ केली. तसेच साडेसहा वाजेच्या सुमारास शिवसेना (शिंदे गट) पक्षाच्या कार्यालयासमोर असलेल्या कुंड्या व दगड मारून कार्यालयाच्या काचा फोडून व काचेचा दरवाजा तोडून नुकसान केले. कार्यालयातील खुर्च्यांची मोडतोड केली.

स्थानिक लोकांनी समजावण्याचा प्रयत्न केला त्या लोकांना मारहाण करून शिवीगाळ केली. तेव्हा प्रा. राजेंद्र लाड यांच्या तक्रारीवरून किरण देवकाते, गौतम ऊबाळे, रोहिणी ठोंबरे विरुद्ध ( सर्व रा.गारखेडा परिसर, छत्रपत्री संभाजीनगर) यांच्याविरुद्ध गोंदी पोलिस ठाण्यात गुन्हा नोंद करण्यात आला आहे.