औरंगाबाद: एकीकडे कोरोनाचे संकट अजूनही गडद असतानाच डेल्टा प्लसची लाट उसळण्याची शक्यता वर्तविली जात आहे. असे असतानाही खुद्द लोकप्रतिनिधी असलेले खासदार इम्तियाज जलील (imtiaz jaleel) यांच्याकडूनच कोरोनाच्या अनुषंगाने घालून देण्यात आलेल्या नियमांना पायदळी तुडविल्याचा प्रकार शनिवारी (ता.तीन) रात्री समोर आला. दौलताबादेत पार पडलेल्या कव्वालीच्या कार्यक्रमाचा व्हिडिओ व्हायरल झाल्याने हा प्रकार उघडकीस आला आहे. कोरोनाच्या दुसऱ्या लाटनेनंतर आता कुठे या परिस्थितीतून शहर सावरायला लागले आहे. एकीकडे तिसऱ्या लाटेची भीती आहे. अशी परिस्थिती असताना वीकेंड लॉकडाउनमध्ये मध्यरात्रीपर्यंत कोरोनाचा नियम न पाळता कव्वालीचा फड रंगला तसेच उपस्थितांनी पैशांची उधळण केली.

जिल्हाधिकाऱ्यांच्या आदेशाने शहरात वीकेंड लॉकडाउन जारी करण्यात आला आहे. असे असतानाही खुद्द खासदारांच्या उपस्थितीत शनिवारी रात्री बारा वाजेपर्यंत दौलताबादेतील अब्दीमंडीजवळील एका फार्म हाऊसवर कव्वालीचा कार्यक्रम रंगला. या कार्यक्रमासाठी प्रमुख पाहुणे म्हणून खासदार इम्तियाज जलील उपस्थित होते. विशेष म्हणजे या कार्यक्रमात गर्दी करण्यात आली. कुणाच्या तोंडावर मास्क नव्हता. तसेच अंतराचे नियम पूर्णपणे पायदळी तुडविण्यात आले.

५०- ६० जणांवर गुन्हा दाखल-
एमआयएमचे जिल्हाध्यक्ष समीर साजेद बिल्डर, माजी नगरसेवक नासेर सिद्दिकी, सोहेल जकीऊद्दीन, फार्म हाउसचे रतीक खान कलीम खान यांनी कव्वालीच्या कार्यक्रमाचे आयोजन केले होते. या कार्यक्रमात व्यासपीठावर खासदार जलील पोचताच एमआयएमच्या कार्यकर्त्यांनी आणि आयोजकांनी खासदार जलील यांच्यावर पैशांची उधळण केली. या कार्यक्रमासंबंधीची माहिती मिळताच दौलताबाद पोलिस ठाण्याच्या निरीक्षक राजश्री आडे यांनी कर्मचाऱ्यांसह धाव घेतली. त्यानंतर हा कार्यक्रम रात्री बारा वाजेच्या दरम्यान बंद पाडला. रात्री सोहेल जकीऊद्दीन, समीर साजेद बिल्डर, नासेर सिद्दिकी, रतीक खान यांच्यासह ५० ते ६० जणांविरुद्ध दौलताबाद पोलिस ठाण्यात गुन्हा दाखल करण्यात आला.