लोहगाव (जि.औरंगाबाद) : ७४ जळगाव येथील खंडोबा मंदिराच्या ओट्यावर बसुन आमच्या घराकडे टक लावून पाहतो. या कारणावरून लोखंडी गजाने बेदम मारहाण केल्याने युवकाचा मृत्यू झाला. या प्रकरणी बिडकीन पोलिसांनी आरोपी बापलेकाना अटक केली असता पैठण न्यायालयाने दोन दिवसांची पोलीस कोठडी सुनावली आहे. याबाबत पोलिसांनी दिलेली माहिती अशी, की औरंगाबाद (Aurangabad) जिल्ह्यातील ७४ जळगाव येथील संतोष प्रकाश एरंडे या युवकाला शुक्रवार (ता.आठ) सायंकाळीच्या वेळी संजय रावसाहेब गटकळ व त्याची मुले जीवन गटकळ, वैभव गटकळ या तिघांनी मिळून गावातील खंडोबा मंदिर वाटेत बसून आमच्या घराकडे टक लावून का पाहतो म्हणून लोखंडी गजाने बेदम मारहाण करून जखमी केले. (Father Son Beaten Youth In Paithan Taluka Of Aurangabad)

या दरम्यान संतोषचा ओरडण्याचा आवाज ऐकून त्याची आई मंदाबाई एरंडे धावत पळत मंदिराजवळ गेली. त्याला का मारता असे विचारले असता आरोपींनी मला ढकलून देत लोखंडी गजाने मुलांच्या डोक्यावर हातपायावर, पाठीवर जबर मारहाण करून जखमी केल्याने पुढील उपचारासाठी त्याला घाटी रुग्णालयात दाखल केल्याची तक्रार शनिवार (ता.दहा) बिडकीन पोलिस ठाण्यात मंदाबाई एरंडे यांनी दिली. मात्र आज मंगळवारी (ता.१२) उपचारादरम्यान जखमी युवकाचा मृत्यू झाला आहे.

त्यावरून जमादार सोमनाथ तांगडे यांच्या चमूने ७४ जळगाव येथे पंचनामा केला व तीन आरोपींना ताब्यात घेऊन त्यांच्यावर भारतीय दंड संहितानुसार गुन्हा दाखल केला. पुढील तपास सहायक पोलीस निरीक्षक संतोष माने यांच्या मार्गदर्शनाखाली फौजदार जगदीश मोरे, हवालदार सोमनाथ तांगडे हे करित आहेत.