छत्रपती संभाजीनगर : अंगावरचे पांढरे डाग बरे करतो, असे आमिष दाखवत दोन तोतया डॉक्टरांनी प्राचार्याला पाच लाख दहा हजारांचा गंडा घातला. नोव्हेंबर २०२३ पासून हा प्रकार सुरु होता. या प्रकरणी प्राचार्याच्या पत्नीने दामिनी पथकाला माहिती दिल्यानंतर पथकाने सोमवारी सापळा रचून दोन्ही तोतया डॉक्टरांना ताब्यात घेतले. या प्रकरणी सायबर पोलिस ठाण्यात गुन्हा दाखल करण्यात आला.

या प्रकरणातील फिर्यादी हे बीड येथे प्राचार्य आहेत. या प्राचार्यांच्या अंगावर पांढरे डाग आहेत. ६ नोव्हेंबरला ते पत्नीला कामानिमित्त सोडण्यासाठी औरंगपुरा भागात गेले होते. यावेळी ते घरी परतत असताना त्यांना एकाने अडवले. त्याने प्राचार्यांच्या अंगावरील डागाची चौकशी करीत आपले नाव शिव शर्मा असल्याचे सांगितले. आपल्या ओळखीचे डॉ. खान असून ते हे डाग बरे करु शकतात, असे सांगत मोबाईल क्रमांक घेतला. यानंतर काही वेळातच प्राचार्यांना खान नावाने कॉल आला. दुसऱ्या दिवशी प्राचार्यांची भेट घेत हे डाग बरे होऊ शकतात, असे सांगितले.

यानंतर उपचाराच्या नावाखाली त्याने प्राचार्यांकडून ३ लाख ९९ हजार आणि औषधीच्या नावाखाली १ लाख १० हजार रुपये उकळले. उपचार केल्यानंतरही फरक पडला नसल्याने आपली फसवणूक झाल्याचे प्राचार्यांच्या आणि त्यांच्या पत्नीच्या लक्षात आले. दरम्यान, सोमवारी डॉ. रंजीत सलीम खान आणि शिव शर्मा हे आरोपी पुन्हा पैसे उकळण्यासाठी प्राचार्यांच्या घरी येणार होते. त्यांच्या पत्नीने दामिनी पथकाला ही माहिती दिली. यावरुन पथकाने सापळा रचून या दोन तोतया डॉक्टरांना ताब्यात घेत अटक केली.

ही कारवाई पोलीस उपायुक्त अपर्णा गिते, पोलीस निरीक्षक प्रविणा यादव यांच्या मार्गदर्शनाखाली दामिनी पथकाच्या पीएसआय कांचन मिरधे, जमादार निर्मला निंभोरे, पोलीस अंमलदार सुरेखा कुकलारे, आयोध्या दौंड, प्रियंका भिवसने, मनीषा बनसोडे यांच्या पथकाने केली.