औरंगाबाद : ‘साक्षरता अभियान’ आजच्या काळात अन्न, वस्त्र, निवारा यासोबतच अजून एक सर्वांत मोठी मूलभूत बाब आहे ती म्हणजे ‘शिक्षण.’ आजच्या विज्ञान युगात जिथे आपण मोबाईल, कॉम्प्युटर, स्मार्ट फोन, वापरतोय तिथे अजूनही कित्येक लोक अशिक्षित आहेत. हे चित्र बदल्यासाठी आणि वंचित घटकातील बेघर मुलांनाही शिक्षणाच्या प्रवाहात यावे, यासाठी रॉबीनहूड आर्मीने रॉबीनहूड अॅकॅडमीच्या माध्यमातून पुढाकार घेतला आहे. रस्त्याच्या कडेने राहणाऱ्या गरजू मुलांना या माध्यमातून मोफत शिक्षण दिले आहे. तीन वर्षांत सहा हजार मुले लाभ घेत आहेत. 

हेही वाचा : योगी ठाकूर यांना ही जाब विचारा  - इम्तियाज जलील  

केवळ परिस्थिती अनुकूल नसल्यामुळे कित्येकजण शिक्षणपासून वंचित राहतात. अशा गरजू मुलांना रॉबीनहूड आर्मी या संघटनेतर्फे ‘रॉबीनहूड अॅकॅडमी’ असा उपक्रम सुरू केलेला आहे. ज्याअंतर्गत ज्या मुलांना अनुकूल परिस्थितीमुळे शालेय शिक्षण घेता येत नाही किंवा ज्यांचे शालेय शिक्षण अर्धवट राहिलेले आहे, त्यांना या संघटनेचे सदस्य स्वतः मोफत शिक्षण देत आहेत. औरंगाबाद शहरातही हा उपक्रम डिसेंबर २०१९ पासून सुरू करण्यात आलेला आहे. या उपक्रमाअंतर्गत ‘सेठ नंदलाल धूत’ हॉस्पिटल शेजारी राहणाऱ्या मूर्तिकारांच्या मुलांना ‘रॉबीनहूड अॅकॅडमी’चे सदस्य शिकवत आहेत. याचा लाभ आतापर्यंत २० विद्यार्थी घेत आहेत. संघटनेने २०१६ पासून हा उपक्रम ७३ शहरांमध्ये सुरू केला आहे. याअंतर्गत या सर्व शहरांत सहा हजार विद्यार्थी याचा लाभ घेत आहेत. 

हेही वाचा - तुमचा विवाह कधी झालाय...बघा जमतेय का काही...  

१,२८० मुलांना मिळवून दिला शाळेत प्रवेश 

या उपक्रमाअंतर्गत राबीनहूड अॅकॅडमीने सरकारच्या विविध योजनेअंतर्गत साधारण १,२८० गरीब मुलांना यावर्षी शाळेत विनामूल्य प्रवेश मिळवून दिला आहे. गरजू मुलांना आजच्या काळात असलेले शालेय शिक्षणाचे महत्त्व पटवून देऊन अशा मुलांना विनामूल्य शाळेत प्रवेश मिळवून शिक्षण देण्यासाठी ‘रॉबीनहूड अॅकॅडमी’चे सर्व सदस्य कार्यरत असल्याची माहिती अॅकॅडमीचे सदस्य योगेश सरोदे यांनी दिली.