औरंगाबाद : डॉ. बाबासाहेब आंबेडकर मराठवाडा विद्यापीठातील १७ मार्चपासून सुरू होणाऱ्या पदवी अभ्यासक्रमाच्या परीक्षा रद्द झाल्या आहेत. या परीक्षा ३१ मार्चपर्यंत पुढे ढकलण्यात आल्या आहेत. विद्यापीठातील सर्व पदव्युत्तर विभाग व संलग्नित महाविद्यालयांच्या तासिकांना ३१ मार्चपर्यंत सुट्टी असणार आहे. विद्यार्थ्यांनाही वसतिगृहे खाली करावी लागणार आहेत. तर प्राध्यापकांनाही २५ मार्चपर्यंत विद्यार्थ्यांना वसतिगृह खाली करावी लागणार आहेत. अशी माहिती कुलगुरु डॉ. प्रमोद येवले यांनी सकाळला दिली.

राज्य शासनाच्या उच्च शिक्षण विभागातर्फे कोरोना विषाणू (कोव्हीड-१९)चा प्रादुर्भाव रोखण्यासाठी प्रतिबंधात्मक उपाययोजना केल्या जात आहेत. साथरोग प्रतिबंधात्मक कायद्यानुसार अधिसूचना काढली आहे. राज्यातील सर्व सरकारी, अनुदानित, खाजगी, शैक्षणिक संस्था, महाविद्यालय, अकृषी विद्यापीठे, तंत्रशास्त्र विद्यापीठे, तंत्रनिकेतने, अभियांत्रिकी व औषधनिर्माणशास्त्र, कला महाविद्यालय यांच्या ३१ मार्चपर्यंत होणाऱ्या सर्व परीक्षा व प्रात्यक्षिके पुढे ढकलण्यात आली आहेत. एक एप्रिल पासूनची परीक्षा व प्रात्यक्षिके पूर्व नियोजित वेळापत्रकानुसार होतील.

हेही वाचा - मराठवाड्यातील ‘कोरोना’बाबत मुख्यमंत्र्यांनी घेतला आढावा

या ठिकाणच्या प्राध्यापकांना २५ मार्चपर्यंत घरी राहून कामकाज करता येणार आहे. आपत्कालीन परिस्थिती उद्भवल्यास किंवा प्रशासकीय कारणास्तव संबंधित विद्यापीठाचे कुलगुरु, प्रकुलगुरु, कुलसचिव, उपकुलसचिव तसेच महाविद्यालय, तंत्रनिकेतनचे प्राचार्य, संचालक, अधिष्ठाता यांनी निर्देश दिल्यास अध्यापकांना तातडीने हजर राहणे बंधनकारक राहील. यावेळी प्रमुखांसह शिक्षकेतर कर्मचारी यांनी नियमित रित्या कार्यालयामध्ये उपस्थित राहणे आवश्यक आहे. विद्यापीठात परीक्षा व मुल्यमापन मंडळाचे संचालक डॉ. गणेश मंझा यांनीही परिपत्रक काढून संबंधितांना कळविले आहे.

हेही वाचा - कोरोना रोखण्यासाठी वेब पोर्टलची निर्मिती

अध्यापक यांनाही २५ मार्चपर्यंत घरी राहून कामकाज करता येणार आहे. कोरोना विषाणूची परिस्थिती पाहून याबाबत कालावधी वाढवण्याबाबत निर्णय घेण्यात येईल.
- डॉ. प्रमोद येवले, कुलगुरु