छत्रपती संभाजीनगर : घाटी रुग्णातील रुग्णसंख्या, वॉर्ड, यंत्र आणि चिकित्सालयीन सामग्री किती आहे, याची तपासणी महाराष्ट्र आरोग्य विज्ञान विद्यापीठाच्या वतीने गठीत समितीकडून गुरुवारी (ता. ११) करण्यात आली. याचा सील बंद अहवाल विद्यापीठाला सादर केला जाणार आहे.

शासकीय वैद्यकीय महाविद्यालय व रुग्णालयातील (घाटी) महाविद्यालयाची शैक्षणिक वर्ष २०२४ -२५ करिता संलग्नता वाढवण्यासाठी या पथकाने गुरुवारी अचानक भेट देत तपासणी केली.धुळे येथील शासकीय वैद्यकीय महाविद्यालयाचे डॉ. अरुण मोरे यांच्या अध्यक्षतेखालील या समितीत नाशिक येथील डॉ. सुवासिनी सोनवडेकर, धुळे येथील डॉ. भाग्यश्री अहिरराव, डॉ. अरुण दोदामणी यांचा समावेश होता.

या समितीने सकाळी नऊ ते दुपारी तीनपर्यंत अपघात विभाग, बाह्य रुग्ण विभागासह काही वॉर्डातही भेट दिली. यात बाह्य रुग्ण विभागातील रुग्ण संख्या, अपघात विभागातील परिस्थिती याची माहिती त्यांनी घेतली. याचा अहवाल तयार करीत तो सील बंद केला. हा अहवाल आरोग्य विज्ञान विद्यापीठाला सादर करण्यात येणार आहे. यानंतर दुपारी तीनच्या सुमारास थेट विद्यार्थ्यांमध्ये जाऊन त्यांनी संवादही साधला.