देवगावफाटा : कोणत्याही परिस्थितीशी दोन हात करण्याची तयारी असली की, यश हे तुम्हाला रोखू शकत नाही. हलाखीच्या परिस्थितीवरही मात करीत सेलू तालुक्यातील चिकलठाणा बुद्रूक येथील भाग्यश्री ही चार्टर्ड अंकौंटंट झाली आहे. परिस्थितीशी संघर्ष करून मिळवलेल्या या यशाबद्दल तिचे कौतुक होत आहे.
घरातील आर्थिक विवंचना, कुटुंबात कोणाचेही उच्च शिक्षण नाही. या आर्थिक विवंचनेमुळे वडील उद्धवराव जाधव हे दुसऱ्याच्या शेतात सालगडी म्हणून काम करतात. तर आई काशीबाई जाधव या देखील मोलमजुरी करून चरितार्थ चालवतात.
जाधव या कुंटुबियांकडे केवळ दोन एकर शेतजमीन असल्यामुळे आपल्या मुलींचे शिक्षण व कुटुंबाचा उदरनिर्वाह शेतीवर कठीण होता. त्यात मुलीचे शिक्षण पूर्ण करणे त्यांच्यापुढे एक मोठे आव्हान होते. परंतु, मुलगी लहानपणापासूनच खूप हुशार होती. त्यामुळे त्यांनी मुलीला उच्च शिक्षण देण्याचा निर्णय घेतला.
भाग्यश्री हिचे प्राथमिक शिक्षण चिकलठाणा येथेच जि.प. शाळेत झाले व पुढील शिक्षण सेलू येथील नुतन महाविद्यालयात पूर्ण झाल्यानंतर वडिलांनी संभाजीनगर येथील देवगिरी काॅलेजमध्ये प्रवेश दिला. भाग्यश्रीने कठोर परिश्रम घेत मोठे यश मिळवून सी. ए. बनण्याचे स्वप्न पूर्ण केले. आपल्या यशाचे श्रेय तिने आपल्या आई-वडिलांना दिले. या यशामुळे ग्रामीण भागातील चिकलठाणा बुद्रूक गावाचा नावलौकिक वाढल्याने ग्रामस्थांनी तिच्यावर कौतुकाचा वर्षाव केला.
चिकाटीने ध्येयाकडे वाटचाल करा. ग्रामीण भागातील विद्यार्थ्यांना चांगल्या दर्जाचे शिक्षण घेणे अवघड जात आहे. परिस्थितीमुळे अनेक होतकरू विद्यार्थ्यांसमोर बरेच अडथळे निर्माण होत आहेत. परंतु, जिद्द, चिकाटीने आपल्या ध्येयाकडे वाटचाल केल्यास यश नक्कीच मिळते. विद्यार्थ्यांनी खचून न जाता अभ्यासात सातत्य राखणे गरजेचे आहे.
— भाग्यश्री उद्धवराव जाधव
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.