karnapura : यात्रेत आपण फिरत असताना अचानक गळ्यातील मंगळसूत्र कोणी काढल्यास साहजिकच मोठ्या व्यक्तीवर संशय निर्माण होतो. मात्र, कर्णपुरा यात्रेत चक्क सहा वर्षांची मुलगी ब्लेडच्या मदतीने मंगळसूत्र कापताना आढळली. शनिवारी रात्री गर्दीत हा प्रकार घडला. वेदांतनगर पोलिसांनी या मुलीमार्फत हे कृत्य करणाऱ्या आईला ताब्यात घेत छावणी पोलिसांच्या स्वाधीन केले.

याप्रकरणी वेदांतनगर पोलिसांनी दिलेल्या माहितीनुसार, शनिवारी दसऱ्यानिमित्त कर्णपुरा येथे बालाजी रथयात्रेचे आयोजन करण्यात आले होते. या सोहळ्यासाठी हजारो भाविकांची गर्दी उसळली होती. या गर्दीत एका महिलेच्या गळ्यातील मंगळसूत्र चोरण्यासाठी कापले असल्याचे त्या महिलेच्या लक्षात आले.

तिने आजूबाजूला पाहिले असता तिच्या बाजूला केवळ सहा वर्षांची मुलगी उभी होती. संशयावरून तिला तेथे असलेल्या वेदांतनगर पोलिस ठाण्याच्या पोलिस निरीक्षक प्रवीणा यादव यांच्या ताब्यात देण्यात आले. निरीक्षक यादव यांनी तिची झडती घेतली असता तिच्याजवळ मंगळसूत्र आणि ते कापण्यासाठी ब्लेड ठेवण्यासाठी तयार करण्यात आलेले यंत्र देखील दिसून आले. निरीक्षक यादव यांनी हा प्रकार ओळखून घेतला.

तिची आई जवळपास आहे याचा अंदाज त्यांना आला. काही वेळातच मुलीच्या इशाऱ्यावरून एका महिलेला ताब्यात घेण्यात आले. ही त्या मुलीची आई निघाली. जिता चिरंजीव भोसले (वय ३५, रा. हसनाबाद, जालना) असे या महिलेचे नाव आहे. जिताला छावणी पोलिसांच्या ताब्यात देण्यात आले असल्याची माहिती निरीक्षक प्रवीणा यादव यांनी दिली.

मुलीच्या खिशात मोबाइल क्रमांकाची चिठ्ठी

पोलिसांनी या मुलीची झडती घेतली असता तिच्या खिशात ब्लेड, ते लपवण्याचे लहान लाकडाचे यंत्र आणि मोबाइल क्रमांक असलेली चिठ्ठी आढळली. हा क्रमांक तिच्या आईच्या मोबाइलचा होता. समजा आई आणि मुलीची हुकाचूक झाली तर मुलीला अडचण येऊ नये म्हणून ही मोबाइल नंबरची चिठ्ठी तिच्या खिशात ठेवण्यात येत होती.