छत्रपती संभाजीनगर : लोकसभा निवडणुकीची धामधूम सुरू असताना शिवसेना ठाकरे गटात नाराजीचे सत्र सुरू आहे. उमेदवारीवरून सुरवातीला चंद्रकांत खैरे व अंबादास दानवे यांच्यात वाद उफाळला. त्यानंतर पदाधिकारी नियुक्तीवर जिल्हाप्रमुख किशनचंद तनवाणी नाराज झाले. दानवे-खैरे संघर्ष मिटल्यानंतर आता खैरे यांनी दानवे-तनवाणी यांना एकत्र आणत पक्षात सर्व आलबेल असल्याचा संदेश देण्याचा प्रयत्न मंगळवारी (ता. नऊ) गुढीपाडव्यानिमित्त केला.

लोकसभा निवडणुकीच्या तिकिटावरून शिवसेना नेते खैरे व विधान परिषदेचे विरोधी पक्षनते दानवे यांच्यात सुरवातीला संघर्ष झाला. त्यानंतर पक्षप्रमुख उद्धव ठाकरे यांनी मध्यस्थी केल्यानंतर हा वाद थांबला. दानवे यांनी खैरे यांच्या घरी जाऊन त्यांना पेढे भरवत वादाला पूर्णविराम दिला. त्यानंतर संघटनात्मक नेमणुकीवरून शिवसेनेचे जिल्हाप्रमुख किशनचंद तनवाणी नाराज झाले.

शहरातील नियुक्त्या करताना आपल्याला विश्वासात न घेतल्याचा आरोप करत ते बैठकांपासून दूर राहिले. त्यानंतर चंद्रकांत खैरे स्वतः तनवाणी यांच्या गुलमंडीवरील कार्यालयात त्यांची मनधरणी करायला गेले होते.

तिथे सामोसे-कचोरीवर प्रदीर्घ चर्चाही झाली. पण, तनवाणी आपल्या भूमिकेवर ठाम होते. मात्र, एकमेकांना पाण्यात पाहणारे दानवे-तनवाणी मंगळवारी मात्र गुलमंडीवर एकत्र आले. हिंदू नववर्ष गुढीपाडव्यानिमित्त गुलमंडीवर गुढी उभारली. शिवसेनेकडून दरवर्षी गुढीपाडव्याला गुलमंडी येथे उंच गुढी उभारली जाते.

या कार्यक्रमात खैरे यांच्या दोन्ही बाजूंना दानवे-तनवाणी उभे होते. त्यामुळे शिवसेनेतील दानवे-तनवाणी यांच्यातील नाराजी पाडव्याच्या निमित्ताने मिटली का? दोघे एकमेकांशी गोड गोड बोलले का? याची चर्चा कार्यक्रमस्थळी होती.