छत्रपती संभाजीनगर : मराठा आरक्षणाच्या अनुषंगाने जिल्ह्यातील नऊ तालुक्यांतील १५ लाख १६ हजार ८१९ महसूल व शैक्षणिक अभिलेख जिल्हा प्रशासनाच्या पथकाने तपासले आहेत. यात कुणबी अशी नोंद असलेले फक्त २९७ पुरावे आढळले आहेत.

मराठा आरक्षणाच्या अनुषंगाने कुणबी नोंदीचे अभिलेखे तपासण्याची मोहीम प्रशासनाने हाती घेतली होती. त्यानुसार जिल्ह्यातील अभिलेख तपासण्याचे काम पूर्णत्वास आले असल्याचे प्रशासकीय सूत्रांनी सांगितले. आत्तापर्यंत झालेली तपासणी, आढळून आलेल्या नोंदीची माहिती विभागीय प्रशासनाकडे वर्ग करण्यात आली आहे. मराठवाड्यात सर्व जिल्ह्यांमध्ये आजपर्यंत सहा हजार अभिलेखांमध्ये कुणबी नोंद आढळून आली आहे. ३० सप्टेंबरला मुख्य समितीच्या बैठकीत विभागातील संपूर्ण माहिती सादर करण्यात येणार आहे.

दृष्टिक्षेपात

महसूल पुरावे : ४३

शालेय पुरावे : ६४

कारागृह : १४

जात वैधता प्रमाणपत्र : १५१

भूमी अभिलेख व इतर : २५

एकूण : २९७