औरंगाबाद : ‘मार्ड’चे डॉक्टर्स शुक्रवार (ता. एक) पासून राज्यभर संपावर आहेत. औरंगाबादेतील घाटी रुग्णालयातही तीनशे निवासी डॉक्टर संपावर आहेत. या संपाचा आज दुसरा दिवस असून आज या डॉक्टरांनी रुग्णालय परिसरात मोर्चा काढला आणि मागण्यांसंदर्भात घोषणा दिल्या.

वैद्यकीय शुल्क माफ करावे, वसतिगृहातील समस्या दूर करावी, डॉक्टरांना रुग्णसेवा करण्यासाठी घाटीत चांगले वातावरण तयार करावे. मानधनात वाढ करावी आदी मागण्यांसाठी संपावर असलेल्या घाटीतील निवासी डॉक्टरांनी दुसऱ्या दिवशीही वैद्यकीय अधीक्षक कार्यालय ते मेडिसीन इमारतीपर्यंत मोर्चा काढला. यावेळी प्रशासन व राज्य शासनांच्या धोरणांविरुद्धही घोषणाबाजी करण्यात आली. मेडिसीन इमारतीसमोर मोर्चा आल्यानंतर छोटेखानी सभा घेण्यात आली.

स्थानिक मार्डचे अध्यक्ष डॉ. अक्षय क्षीरसागर, डॉ. ऋषिकेश फडणीस, डॉ. आबासाहेब तिडके, डॉ. कांचन देवडे, डॉ. योगिता देवरे, डॉ. दीप्ती आनंद आणि डॉ. सूचित सूर्यवंशी यांनी मोर्चेकरी डॉक्टरांना संबोधले. यावेळी डॉ. अमृता माने, डॉ. ऋषिकेश गव्हाणे, डॉ. उमेश येवले, डॉ. सौरभ डिकोळे, डॉ. मल्लिका अग्रवाल, डॉ. काव्या भट, डॉ. अभय कावेडिया आदींची उपस्थिती होती. दरम्यान, मागण्या पूर्ण न झाल्यास अत्यावश्यक सेवा व शस्त्रक्रियासंबंधित सेवा बंद करण्याचा इशाराही मार्डच्या पदाधिकाऱ्यांनी दिला.

बेमुदत संप मार्डच्या मध्यवर्ती संघटनेच्या मार्गदर्शनाखाली सुरूच राहणार आहे. संपात घाटी रुग्णालयातील तीनशे निवासी डॉक्टर सहभागी झाले आहेत.

-डॉ. अक्षय क्षीरसागर, स्थानिक अध्यक्ष, ‘मार्ड’संघटना.