लासूर स्टेशन : मुंबई वाशी येथे पूर्णवाद पॉलिटिकल सायन्स अकादमीतर्फे गंगापूर खुलताबाद मतदारसंघाचे आमदार प्रशांत बंब यांना कै.उत्तमराव पवार स्मृती युवक क्रांतिवीर पुरस्काराने सन्मानित करण्यात आले.

तालुक्यात प्रभावीपणे राबविलेली गंगापूर उपसा जलसिंचन योजना, जलजीवन मिशन योजना, तसेच नदी, नाले खोलीकरणासह केलेली विकास कामे आणि वैयक्तीक लाभार्थ्यांना दिलेला लाभ याची दखल घेऊन त्यांना राजकीय क्षेत्रात उत्कृष्ट कामगिरी केल्याबद्दल यंदाचा ९ वा पुरस्कार देण्यात आला. स्मृतिचिन्ह, प्रमाणपत्र असे या पुरस्काराचे स्वरूप आहे.

पालकमंत्री गणेश नाईक, आमदार नीलेश लंके, लक्ष्मीकांत पारनेरकर, राहुल पाटील, शेखर चरेगावकर आदी मान्यवरांच्या प्रमुख उपस्थितीत हा सोहळा पार पडला. पूर्णवाद पॉलिटिकल अकादमीचा पुरस्कार आयुष्यातील मौल्यवान क्षण आहे. हा सन्मान माझा नसून मतदार जनतेचा आहे. मतदार संघातील नागरिकांनी दिलेल्या प्रेमाची आणि विश्वासाची ही पावती आहे.

— प्रशांत बंब, आमदार, गंगापूर-खुलताबाद मतदार संघ.