औरंगाबाद: केंद्रीय मंत्री नारायण राणेंनी (narayan rane) मुख्यमंत्री उद्धव ठाकरेंबद्दल केलेल्या वादग्रस्त विधांनामुळे आज महाराष्ट्रभर शिवसेना आक्रमक झालेली दिसली होती. ठिकठिकाणी नारायण राणेंचे पुतळे जाळले होते, काही ठिकाणी फोटोंना काळं फासलं तर काही ठिकाणी गाढवावरून मिरवणूकही काढली होती. वाढता तणाव पाहता रत्नागिरी पोलिसांनी राणेंना अटक केली आहे. तर इकडे औरंगबादेत भाजपही आक्रमक झालेली दिसत आहे. राणेंना अटक केल्याच्या निषेधार्थ भाजप आक्रमक झालेली दिसत आहे. औरंगाबादच्या क्रांती चौकात भाजपने आंदोलन केले आहे. याच ठिकाणी सकाळी शिवसेनेच्या कार्यकर्त्यांनीही राणेंविरोधात आंदोलन केले होते.

या आंदोलनात मुख्यमंत्र्यांचे पोस्टर जाळले आहेत. या पोस्टरवर 'घर कोंबडा' असं लिहलेलं आहे. यावेळी मुख्यमंत्र्यांविरोधात आणि राज्य सरकारविरोधात घोषणा दिल्या जात आहेत. या आंदोलनाठिकाणी भाजप कार्यकर्त्यांची मोठी गर्दी झाली होती. आज सकाळपासून राज्यभरात शिवसेना आणि भाजप दोन्ही पक्ष एकमेकांविरोधात आंदोलने करताना दिसत आहेत.