औरंगाबाद : आझाद चौकात कारला धक्का लागल्याच्या कारणावरून पोलिस निरीक्षक राजेश मयेकर (Police Inspector Rajesh Mayekar) यांनी रिक्षाचालकाला भरचौकात अश्लील भाषेत शिवीगाळ करीत श्रीमुखात भडकावली. रस्त्यात घडलेल्या या घटनेचा व्हिडिओ प्रचंड व्हायरल झाल्याने नागरिकांमध्ये संताप व्यक्त करण्यात आला. आझाद चौकामध्ये (Crime In Aurangabad) शनिवारी (ता. सात) सकाळी अकराच्या सुमारास एका मिनी ॲपेरिक्षाचा जिन्सी पोलिस ठाण्याचे पोलिस निरीक्षक राजेश मयेकर यांच्या कारला धक्का लागला. त्यामुळे मयेकर यांनी अर्वाच्य भाषेत शिवीगाळ (Crime Against Police) करत, रिक्षाची चावी काढून घेतली. विशेष (Aurangabad) म्हणजे, भररस्त्यात पोलिस निरीक्षकाकडून रिक्षाचालकावर दादागिरी सुरू होती. रिक्षाचालक चावी परत द्या, म्हणत हात जोडून विनंती करत होता.

तसेच कारचे जे काही नुकसान झाले असेल त्याची भरपाई देतो, असे विनवणी करून सांगत होता. त्यावर साडेदहा लाख रुपये मला दे, असे म्हणत चल पोलिस स्टेशनला, तुझ्यावर गुन्हा दाखल करतो, असे सुनावतानाच त्याच्या श्रीमुखात भडकावली. पोलिसाच्या या अरेरावीचा व्हिडिओ काही वेळातच सोशल मीडियावर प्रचंड व्हायरल झाला. यामुळे पोलिस खात्याची प्रतिमा मलिन झाल्याची भावना जनसामान्यांतून व्यक्त होत होती. या प्रकरणात उशिरापर्यंत पोलिस ठाण्यात तक्रार करण्यात आलेली नाही.

वाहनाला धक्का लागला म्हणून ही घटना घडली आहे. मात्र, पोलिस अधिकाऱ्यांनी भररस्त्यात अशा पद्धतीने शिवीगाळ करणे किंवा चुकीचे वर्तन करणे योग्य नाही. या प्रकरणाची चौकशी करण्यात येणार आहे.

- दीपक गिऱ्हे, पोलिस उपायुक्त