जरंडी : अवकाळीच्या तडाख्यामुळे थांबलेल्या रब्बीच्या पेरण्यांची गती वाढली असून दुष्काळामुळे बाधित झालेल्या शेतकऱ्यांनी पुन्हा डिसेंबरच्या दुसऱ्या आठवड्या पासून पेरण्याचा वेग घेतला आहे. दुसऱ्या टप्प्यात रब्बीच्या पेरण्यासाठी शेतकऱ्यांनी मका आणि गहू पिकांना पसंती दिली आहे.

तालुक्यात दिवाळीच्या नंतर काही प्रमाणात रब्बीच्या पेरण्या झाल्या होत्या. पहिल्या टप्प्यात झालेल्या रब्बीच्या पेरण्यांमध्ये एक हजार ७२९ हेक्टरवर ज्वारी, गहू, मका, हरभरा, भुईमूग आणि करडई या सहा पिकांची पेरण्या झाल्या. परंतु नोव्हेंबरच्या अखेरीस सलग पाच दिवस अवकाळीच्या संकटाने तडाखा दिल्यामुळे या रब्बीच्या कोवळ्या पिकांचे वाढीच्या अवस्थेत नुकसान झाले होते.

आधीच दुष्काळाच्या झळा अन् त्यात अवकाळीच्या कळा यामुळे सोयगाव तालुक्यातील शेतकऱ्यांनी रब्बीच्या पेरण्यांना ब्रेक दिला होता. परंतु डिसेंबर महिन्याच्या दुसऱ्या आठवड्यात वातावरणात बदल होऊन थंडीत वाढ झाल्याने पुन्हा रब्बीच्या दुसऱ्या टप्प्यातील पेरण्या सुरू झाल्या आहे.

थंडीमुळे पेरण्या वाढल्या

सोयगाव तालुक्यात डिसेंबर महिन्याच्या दुसऱ्या आठवड्यात अचानक थंडीत वाढ झाल्याने गहू पिकांच्या पेरण्या वाढल्या आहे. रब्बीच्या पिकांची पीकविमा भरण्याची मुदत शुक्रवारी (ता.१५) संपली आहे. त्यातच रब्बीच्या नजर अंदाज आणेवारीची मदत (ता.३१) डिसेंबर आहे. त्यामुळे शेतकऱ्यांची गुंतागुंत वाढणार आहे.

पहिल्या टप्प्यात

रब्बीच्या पेरण्या

• ज्वारी ७०७ हेक्टर

• गहू ३९४ हेक्टर

• मका १०७४ हेक्टर

• हरभरा ५१७ हेक्टर

• भुईमूग २५ हेक्टर

• करडई २ हेक्टर

• एकूण पेरणी :

२ हजार ७२९ हेक्टर