छत्रपती संभाजीनगर : प्रभू श्रीराम यांनी ज्या मार्गाने यात्रा केली, त्याच मार्गाने श्रीलंकेतील प्रभू श्रीराम आणि सीतामाईच्या पावन पादुका घेऊन निघालेली रामराज्य युवा यात्रा गुरुवारी शहरात दाखल झाली. या यात्रेचे भव्य शोभायात्रा काढून जल्लोषात स्वागत करण्यात आले. यावेळी पादुकांच्या दर्शनासाठी भाविकांनी गर्दी केली होती.

२२ जानेवारीला अयोध्येत होणाऱ्या प्रभू श्रीरामाच्या प्रतिष्ठापनेचे औचित्य साधून श्रीलंकेतील प्रभू श्रीराम आणि सीतामाईच्या पावन पादुका घेऊन रामराज्य युवा यात्रा १५ डिसेंबरला श्रीलंकेतून राम अवतार आणि प्रदोष चव्हाणके यांच्या नेतृत्वाखाली निघाली. सर्वत्र संचार करून ही यात्रा २० जानेवारीला अयोध्येत पोचणार आहे.

या रामराज्य यात्रेचे गुरुवारी महावीर स्तंभमार्गे सायंकाळी साडेपाच वाजता क्रांतिचौकात आगमन झाले. यावेळी फटाक्यांची आतषबाजी करण्यात आली. रथात असलेल्या पादुकांचे भाविकांनी दर्शन घेतले.

शोभायात्रेत साधू, संत-महंत देखील सहभागी झाले होते. गुलमंडीवरील धर्मसभेने या यात्रेचा समारोप करण्यात आला. यावेळी सकल हिंदू जनजागरण समितीचे स्वागत अध्यक्ष केंद्रीय अर्थराज्यमंत्री डॉ. भागवत कराड, रामराज्य युवा यात्रेचे राष्ट्रीय समन्वयक आशुतोष, आमदार प्रदीप जैस्वाल, सुरेश चव्हाण, शिरीष बोराळकर, हर्षवर्धन कराड, जगदीश बियाणी, राजीव जहागीरदार, संजय खंबायते, नरेश सिकची, लक्ष्मीनारायण राठी, महावीर पाटणी, राजीव जहागीरदार, दयाराम बसैय्ये, विजया अवस्थी आदींची उपस्थिती होती.