औरंगाबाद : आता ही भारतीय जनता पक्षाच्या (BJP) राष्ट्रीय सचिव पंकजा मुंडे (Pankaja Munde) नाराज असल्याच्या चर्चा ऐकायला मिळत आहेत. याबाबत केंद्रीय राज्यमंत्र्यांनी आपली भूमिका स्पष्ट केली आहे. पंकजा मुंडे या मला भेटल्या. त्या नाराज असल्याचे अजिबात वाटत नसल्याचे केंद्रीय रेल्वे राज्यमंत्री रावसाहेब दानवे (Union Minister Of State For Railway Raosaheb Danve) यांनी सांगितले. आज मंगळवारी (ता.१७) श्री.दानवे औरंगाबादेत मंत्रीपदाचे सूत्र स्वीकारल्यानंतर पहिल्यांदाच आले होते. त्यांचे रेल्वेस्थानकावर स्वागत करण्यात आले. त्यावेळी ते बोलत होते. श्री.दानवे म्हणाले, की भाजपचे मंत्री जनआशीर्वाद यात्रा (Jan Ashirwad Yatra) काढत आहेत. हे शक्तिप्रदर्शन नसल्याचे त्यांनी स्पष्ट केले. कार्यकर्ता फिरला पाहिजे. त्यातून वेगवेगळे प्रश्न कळतात. त्यामुळे ही यात्रा सुरु आहे, असे श्री.दानवे म्हणाले.

सरकारने सर्वोच्च न्यायालयात बाजू व्यवस्थित न मांडल्याने मराठा आरक्षण रद्द झाले. आम्ही ओबीसी समाजाला न्याय दिला असल्याने तो आमच्यापासून फोडणे अशक्य असल्याचे श्री.दानवे यांनी सांगितले.

मुंबई-औरंगाबाद अंतर दीड तासातच

मराठवाड्यातील रेल्वेचे प्रश्न सोडवणार आहे. नागपूर-मुंबई हा रेल्वेमार्ग बुलेट ट्रेनने जोडला गेला तर मुंबईहून औरंगाबादला दीड तासात तर नागपूरला तीन तासात जाता येईल, असे केंद्रीय रेल्वे राज्यमंत्री रावसाहेब दानवे यांनी सांगितले.