वाळूज : मागील दहा ते बारा दिवसांपासून वाळूज परिसरात पावसाने ओढ दिली आहे. त्यामुळे शेतकऱ्यांच्या जिवाची घालमेल सुरू आहे. पावसाअभावी खरीप पिके माना टाकत आहेत. त्यातून दुबार पेरणीचे संकट ओढवण्याची चिन्हे असल्याने शेतकऱ्यांत अस्वस्थता आहे. आठवडाभरात पाऊस न झाल्यास शेतकऱ्यांनी केलेला खर्च वाया जाण्याची शक्यता आहे.

यंदा परिसरात मृगाचा पाऊस अगदी सात जूनला सुरू झाला. दोन दिवसांचा मध्यंतरीचा खंड वगळता सलग आठवडाभरापासून मोठा पाऊस नाही. पावसाचे प्रमाण प्रारंभी समाधानकारक असल्याने शेतकऱ्यांनी लागवड केली. त्यासाठी महागडी बी-बियाणे, खते आणली. सर्वांनी लागवडी सुरू केल्याने मजुरांचीही पळवापळवी झाली.

अनेकांनी मजुरी वाढवून देत मजुरांना आपल्याकडे नेले. त्यावेळी परिसरातील मजूरही भाव खाऊन गेले, अशा ओढाताणीत शेतकऱ्यांनी काळ्या आईच्या कुशीत बियाणे टाकले. लागवडीच्या वेळी शेतीत ओल बऱ्यापैकी असल्याने पिकांची उगवण चांगली झाली आहे. काही भागांत लागवडीनंतरही पाऊस पडल्याने पिके अंकुरली. त्यानंतर मात्र, पाऊस गायब झाला आहे.

काळ्या निळ्या ढगांची होते फक्त गर्दी

शेतकरी आभाळाकडे टक लावून बसले आहेत. अंकुरलेले बियाणे करपून जाऊ नये, यासाठी शेतकरी वरुण राजाच्या प्रतीक्षेत आहेत. दररोज आकाशात काळ्या निळ्या ढगांची पळापळ होते. गर्दीने दाटून आलेले ढग आता खूप बरसणार असे वातावरण तयार होते. मात्र, त्यानंतर सुटलेला वारा हे सर्व पळवून लावतो. त्यातून पावसाची वाट पाहणारे शेतकरी हिरमुसून जातात.