Latest Cha.Sambhajinagar: शहरातील पैठणगेटसारख्या गजबजलेल्या परिसरात पश्चिम बंगालसह अन्य भागांतून महिलांना आणून सुरू केलेल्या देहविक्री व्यवसायावर पोलिसांनी गुरुवारी (ता. २८) रात्री छापा मारला. या ठिकाणाहून दोन महिलांची सुटका करण्यात आली. या प्रकरणात देहविक्रीचा व्यवसाय करणाऱ्यांसह पाच जणांना ताब्यात घेण्यात आले.

अटक करण्यात आलेल्यांमध्ये संदीप भिकाजी खाजेकर (वय २४, रा. ता. गंगापूर), राजू सुभाष साळवे (वय २२, रा. नागसेननगर, उस्मानपुरा), विशाल सुरेश भुजंगे (वय ३०, रा. भीमनगर, भावसिंगपुरा), भावेश प्रवीण जाधव (वय २०, रा. रामनगर, हर्सूल), इरफान गफार देशमुख (वय २८, रा. बीड) यांचा समावेश आहे.

याप्रकरणी क्रांती चौक पोलिसांनी दिलेल्या माहितीनुसार ः पैठणगेट परिसरात असलेल्या अशोका हॉटेलमध्ये देहविक्रीचा व्यवसाय होत असल्याची माहिती पोलिसांना मिळाली होती. यावरून पोलिसांच्या पथकाने डमी ग्राहक पाठवून या ठिकाणी व्यवसाय होत असल्याबाबत खात्री केली. डमी ग्राहकाने इशारा करताच हॉटेलवर छापा मारण्यात आला.

या कारवाईत संदीप खाजेकरसह हॉटेलचा मॅनेजर राजू साळवे, रिसेप्शनिस्ट विशाल भुजंगे; तसेच रूमबॉय भावेश जाधव, इरफान देशमुख यालाही ताब्यात घेण्यात आले. या हॉटेलच्या रूम नंबर १०४ मधून वस्तूही ताब्यात घेण्यात आल्या.

या कारवाईत पाचही जणांकडून एकूण ८९ हजार ८१६ रुपयांचा मुद्देमाल जप्त करण्यात आला. या प्रकरणात सहायक फौजदार निवृत्ती साहेबराव गोरे यांच्या तक्रारीवरून क्रांती चौक पोलिस ठाण्यात गुन्हा दाखल करण्यात आला. या प्रकरणाचा तपास पोलिस निरीक्षक सुनील माने करीत आहेत