छत्रपती संभाजीनगर : आपल्या फायद्यासाठी लहान मुलांकडून गुन्हेगारी कृत्ये करवून घेण्याचे प्रकार आता सर्रास पाहायला मिळत आहेत. असाच प्रकार छत्रपती संभाजीनगर जिल्ह्यात एका बँकेत घडला आहे. एका साधारण १२ ते १३ वर्षाच्या मुलानं बँकेच्या ग्राहकाची ३३ हजार रुपयांची रोकड लंपास केल्याचं बँकेच्या सीसीटीव्हीत कैद झालं आहे. त्यामुळं आता या मुलाला शोधणं आणि त्याला हे कृत्य करायला भाग पाडणाऱ्या गुन्हेगारांचा शोध पोलीस घेत आहेत.

साम टीव्हीच्या वृत्तानुसार, छत्रपती संभाजी नगर जिल्ह्यातील वैजापूरच्या एका को-ऑपरेटिव्ह बँकेमध्ये एका चिमुकल्यानं ग्राहकाची तब्बल 33 हजाराची रोकड लांबविल्याची घटना घडली आहे. चोरी करतानाची ही घटना सीसीटीव्ही कॅमेऱ्यात कैद झाली आहे. हातामध्ये लाल पिशवी घेऊन हा मुलगा बँकेत आला होता. गर्दीचा फायदा घेऊन त्यानं ग्राहकाची रोकड लंपास केली.

या घटनेची माहिती मिळताच वैजापूर शहर पोलीस बँकेत दाखल झाले. मात्र, तोपर्यंत हा चिमुकला तेथून पसार झाला. त्यामुळं सीसीटीव्हीच्या आधारे आता या मुलाचा शोध पोलिसांनी सुरू केला असून लहान मुलांच्या हातून चोरी घडवून आणणाऱ्या मुख्य आरोपीचा शोध घेणे हे देखील आता पोलिसांसमोर आव्हान असणार आहे.