छत्रपती संभाजीनगर : मध्यंतरी हिवाळा सुरू होऊनही तापमान वाढून थंडी गायब झाली होती. हवामानाचा अंदाज घेत बहुतांश तिबेटियन व्यापाऱ्यांनी दुकाने गुंडाळून घर गाठले. त्यानंतर आता मात्र पुन्हा थंडी पडली आहे. या संभ्रमित वातावरणामुळे तिबेटियन मार्केटमधील व्यापाऱ्यांना गेल्या १४ वर्षांतील सर्वाधिक फटका बसला आहे. येथील व्यापाऱ्यांनी आतापर्यंत जवळपास चाळीस दुकाने बंद केली असून उर्वरित दुकानेही दोन दिवसांत बंद करणार असल्याचे व्यापाऱ्यांनी सांगितले.

दरवर्षी दिवाळीत कडाक्याची थंडी जाणवते. पण, यंदा दिवाळीत थंडी जाणवलीच नाही. त्यातच १० ऑक्टोबर ते ३० जानेवारी दरम्यान उबदार कपड्यांचे तिबेटियन मार्केट ग्राहकांसाठी खुले होते. २००९ ते २०२३ या चौदा वर्षांदरम्यान आतापर्यंत आम्हाला सर्वाधिक तोटा सहन करावा लागला असल्याचे तिबेटियन स्वेटर विक्रेते असोसिएशनचे अध्यक्ष एस. डी. चौबेल यांनी सांगितले. मधल्या काळात वातावरणातील बदलामुळे सर्वाधिक उष्णता जाणवली. यामुळे उबदार कपडे खरेदी करण्याकडे ग्राहकांनी पाठ फिरवली. मार्केटमध्ये जवळपास पन्नास दुकाने होती.

त्यातील अनेक दुकानांतील विक्रीविना माल तसाच पडून होता. परिणामी, त्यामुळे वेळेआधीच काही दुकाने बंद करावी लागली. मोजकीच दुकाने सुरू होती, पुढे तेही बंद करावी लागतील. हिवाळ्यात स्वेटर विक्रेत्यांच्या हाती मात्र मुद्दलही मिळाली नाही, अशी व्यथा काही विक्रेत्यांनी व्यक्त केली. दरम्यान, आता दुकानदार परतल्यानंतर थंडी परतली आहे. त्यामुळे व्यापाऱ्यांचे नुकसान झाले. आता पुन्हा येणे परवडणारे नाही. त्यामुळे पुढील वर्षीच येणार असल्याचेही काही विक्रेत्यांनी सांगितले.

अशी झाली सुरवात

शहरात १९८० ते ८५ दरम्यान तिबेटियन विक्रेते विविध भागांत दुकाने लावत होते. १९८६ ते २००० दरम्यान सर्व तिबेटियन विक्रेत्यांनी एकत्र संघटित होत मध्यवर्ती बस स्थानकाबाहेरील फुटपाथवर दुकाने थाटली. पुढे यास विरोध झाल्याने २००१ ते २००७ या दरम्यान दुकाने औरंगपुरा भाजीमंडईत मनपाच्या जागी हलवण्यात आले. त्यानंतर पुन्हा येथून ही दुकाने कर्णपुरा मैदानात लावण्यात आले. एका वर्षानंतर म्हणजे २००९ पासून ते आतापर्यंत हे मार्केट मध्यवर्ती बसस्थानकाजवळील औरंगाबाद टेक्स्टाईल मिलच्या जागेवर भरविल्या जात आहे.

फुटपाथच्या दुकानाचा परिणाम!

तिबेटियन मार्केटच्या बाहेरील फुटपाथवर काही अनधिकृत दुकाने थाटली गेली आहेत. हे दुकानदार कुठल्याही भावात स्वेटरची विक्री करतात, त्यामुळेही तिबेटियन विक्रेत्यांच्या दुकानावर परिणाम झाला आहे.

वातावरणात बदल झाल्याने मधल्या काळात थंडी गायब होऊन उन्हाळ्यासारखे वातावरण झाले होते. त्यामुळे दुकाने बंद करावी लागली. आतापर्यंतचा सर्वाधिक तोटा यावेळेस झाला आहे. गेल्या वर्षी हीच परिस्थिती होती आणि आता त्याहूनही बिकट आहे.

- एस. डी. चौबेल,

अध्यक्ष, तिबेटियन स्वेटर विक्रेता असोसिएशन