वाळूज, ता. १४ (बातमीदार) : मकरसंक्रांतीला अनन्यसाधारण महत्त्व असलेल्या सुगडी व वाणाचे साहित्य खरेदीसाठी महिलांनी वाळूजच्या नगर - छत्रपती संभाजीनगर महामार्गावर गर्दी केली होती. तर सराफ बाजारही ग्राहकांनी फुलून गेला होता.

मकरसंक्रांत सोमवारी आहे. या सणाला मातीचे सुगडे, तीळ व विविध फळे, गव्हाच्या ओंब्या, ज्वारीची कणसे, ऊस आदींनी युक्त अशा वाणाला महत्त्व आहे. येथील नगर -छत्रपती संभाजीनगर महामार्गावर सुगडी व वाणाच्या साहित्याची दुकाने थाटली होती. या साहित्यांच्या खरेदीसाठी महिलांनी मोठी गर्दी केली होती. रात्री उशिरापर्यंत महिलांची खरेदी सुरू होती.

सराफ बाजारही महिला ग्राहकांनी फुलून गेला होता. एकूण मकरसंक्रांत सणाचा उत्साह बाजारपेठेत बऱ्यापैकी दिसून आला.