छत्रपती संभाजीनगर : देवीच्या मूर्तीचे विसर्जान करण्यासाठी गेलेले बापलेक शनिवारी (ता. १२) पूर्णा नदीपात्रामध्ये बुडाले होते. अग्निशमन दल व आपत्ती व्यवस्थापनाच्या पथकाला रविवारी (ता. १३) दुपारी त्यांचे मृतदेह शोधण्यात यश आले.
ऐन विजयादशमीच्या दिवशीची ही घटना ताजी असतानाच रविवारी सिल्लोड तालुक्यातील निल्लोड येथे तरुणाचा विहिरीत बुडून, सिरसाळा तांडा येथे महिलेचा तलावात बुडून, तर बाजारसावंगी (ता. खुलताबाद) येथील पोहण्यास गेलेल्या विद्यार्थ्यांचा विहिरीत बुडून मृत्यू झाला.
निल्लोड येथे तरुण, तर सिरसाळा तांडा येथे बुडाली महिला
सिल्लोड : तालुक्यात रविवारी घडलेल्या दोन वेगवेगळ्या घटनांमध्ये पाण्यात बूडून एका महिलेचा, तर एका तरुणाचा मृत्यू झाला.निल्लोड (ता. सिल्लोड) येथे विहिरीत पडल्यामुळे निवृत्ती लक्ष्मण आहेर या तरुणाचा मृत्यू झाला. तर, दुसऱ्या घटनेमध्ये सिरसाळा तांडा येथे तलावामध्ये बुडून सगुणाबाई पवार या महिलेचा मृत्यू झाला. दोन्ही घटनांची माहिती महसूल प्रशासनाच्या वतीने देण्यात आली.
मित्रांसोबत गेला होता पोहण्यास
बाजार सावंगी : मित्रांसोबत पोहण्यासाठी गेलेल्या विद्यार्थ्याचा विहिरीत बुडून मृत्यू झाला. ही घटना सोबलगाव (ता. खुलताबाद) शिवारातील गट क्रमांक ५० मध्ये रविवारी (ता.१३) दुपारी अडीच वाजेच्या सुमारास घडली. गौरव मनोहर जाधव (वय १७, रा. बाजार सावंगी, ता. खुलताबाद) असे मृताचे नाव आहे. तो वाळूज येथे इंजिनिअरिंग कॉलेजच्या दुसऱ्या वर्षात शिक्षण घेत होता. दसऱ्याच्या सुट्या असल्याने गावी आला होता.
पोलिस पाटील कारभारी नरवडे यांनी येथील पोलिस चौकीत दिलेल्या माहितीवरून जमादार दिलीप बनसोड, विनोद बिघोत, संतोष भालेराव, प्रकाश ठोकळ व संतोष पुंड यांनी घटनास्थळी धाव घेतली.
चार ते पाच जणांच्या मदतीने विहिरीत त्याचा शोध घेण्याचा प्रयत्न केला. परंतु, सापडत नसल्याने छत्रपती संभाजीनगरच्या अग्निशमन दलाला पाचारण केले. पथक प्रमुख लक्ष्मण कोल्हे व त्यांच्या सहकाऱ्यांनी पाण्यात उतरून शोध घेतला असता पाचच्या सुमारास त्याला वर काढले.
यानंतर बाजार सावंगी आरोग्य केंद्रात दाखल केले असता येथील वैद्यकीय अधिकारी डॉ. अंजुमन निलोफर यांनी तपासून मृत घोषित केले. पोलिसांनी पंचनामा केल्यानंतर शवविच्छेदन करण्यात आले. याप्रकरणी आकस्मिक मृत्यूची नोंद करण्यात आली असून अधिक तपास पोलिस करत आहेत. त्याच्या पश्चात आई-वडील, आजी-आजोबा, एक लहान भाऊ असा परिवार आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.