बीड : दुसऱ्या लग्नाचे आमिष दाखवून महिलेचे बाळ विक्री प्रकरणातील फरार असलेल्या मास्टरमाईंड ललिता मनोहर भिसे हिला एएचटीयू कक्षाच्या पथकाने बुधवारी (ता २५) पुण्यातून अटक केली. तिला गुरुवारी (ता. २६) न्यायालयासमोर हजर केले असता न्यायालयाने तिला तीन दिवसांची पोलिस कोठडी सुनावली.

माजलगाव येथील पतीने सोडून दिलेल्या महिलेला लग्नाचे आमिष दाखवत तिचे बाळ तीन लाख ५० हजार रुपयांत विक्री केले होते. या टोळीचा पर्दाफाश शिवाजीनगर पोलिसांत गुन्हा दाखल होऊन तपास अनैतिक मानवी वाहतूक कक्षाकडे वर्ग झाला.

या कक्षाने पीडितेला तिचे बाळ मिळवून देत किशोर भोजने, छाया देशमुख, राघोबा केरकार, नामदेव सावंत, स्वप्नजा जोशी, एजंट दीपक केळीलकर यांना बेड्या ठोकल्या. सर्व आरोपी न्यायालयीन कोठडीत आहेत. मात्र, यातील मास्टरमाईंड ललिता फरार होती.

ती पुण्यात मामाच्या मुलाच्या घरी असल्याची माहिती मिळताच तिला बुधवारी रात्री बेड्या ठोकण्यात आल्या. तिला तीन दिवसांची पोलिस कोठडी सुनावण्यात आली.

कारवाईत अनैतिक मानवी वाहतूक कक्षाच्या सहायक निरीक्षक सुरेखा धस, उपनिरीक्षक जगदीश मोरे, सहायक उपनिरीक्षक प्रताप वाळके, सतीश बहिरवाळ, विकास नेवडे, सुरेखा उगले, मनिषा राऊत, चंद्रभागा मुळे, हेमा वाघमारे यांनी सहभाग घेतला होता.