गेवराई (जि.बीड) : शहरातील संजयनगर भागात राहणारा तरुण पैठणच्या उजव्या कालव्यात पोहण्यासाठी गेला होता. पाण्यात उडी मारल्यानंतर तो वर आलाच नाही. तब्बल दोन दिवसानंतर त्याचा मृतदेह आढळून आला. ऋषीकेश दिगंबर शेवाळे (वय १४, रा. संजय नगर, गेवराई) हा मंगळवार (ता.नऊ) सकाळी आपल्या मित्रासोबत पैठणच्या उजव्या कालव्यात पोहण्यासाठी गेला होता. पोहण्यासाठी त्यांनी कालव्यात उडी मारली त्यानंतर तो मात्र वर आलाच नाही.

यावेळी सोबत असलेल्या मित्रांनी व भावाने पाण्यात शोध घेतला. परंतु उपयोग झाला नाही. या मित्राने आरडाओरड केल्यानंतर परिसरातील शेतकरी या ठिकाणी जमा झाले होते. त्यांनी प्रशासनाला माहिती दिल्यानंतर ऋषीकेशचा शोध मंगळवारपासून घेतला जात होता. बुधवारी तहसीलदारांनी देखील या प्रकरणाची माहिती घेतली होती. संजयनगर भागातील मासे पकडणाऱ्या काही लोकांनी कालव्यावर असलेल्या पुलाला मासे पकडण्याचे जाळे लावले होते. गुरुवारी सकाळी ऋषीकेशचा मृतदेह त्याच जाळ्यात अडकलेला आढळून आला. पोलिसांनी घटनास्थळी पंचनामा करून मृतदेह ताब्यात घेत शवविच्छेदनासाठी गेवराई उपजिल्हा रूग्णालयात पाठविला.

संपादन - गणेश पिटेकर