बीड : पवनचक्की कंपनीच्या अधिकाऱ्याला गावठी कट्ट्याचा धाक दाखवून बारा ते तेरा जणांनी अपहरण केले. त्यांच्याकडे दोन कोटींची खंडणीची मागणी केली. केज परिसरात मंगळवारी (ता. २८) रात्री हा प्रकार घडला. दरम्यान, दोघांनी आपली सुटका करून घेत केज पोलिस ठाण्यात संशयितांविरुद्ध गुन्हा नोंद केला.

‘अवादा’ या पवनचक्की कंपनीच्या प्रकल्पाच्या उभारणीचे काम करीत असलेले अधिकारी सुनील केदू शिंदे (टागोरनगर नाशिक, ह. मु. जालना रोड, बीड) आणि त्यांचे काही सहकारी वाहनातून मंगळवारी बीडकडून केजकडे येत होते. रात्री अकराच्या सुमारास मस्साजोग ते केज दरम्यान गंगा माउली साखर कारखान्याजवळच्या टोलनाका परिसरात जीपचालकाने (स्कॉर्पिओ-एमएच १५ ईबी २६८२) इशारा करून त्यांचे वाहन थांबविले.

त्यानुसार सुनील शिंदे यांनी वाहन थांबवले. ‘आपण अधिग्रहित करीत असलेल्या पवनचक्कीच्या जागेसंदर्भात बोलायचे आहे’, असे म्हणून रमेश घुले (रा. केज) याने गावठी कट्ट्याचा धाक दाखवून त्याच्यासोबतच्या सहकाऱ्यांसह सुनील शिंदे व त्यांच्या सहकाकऱ्यांचे अपहरण केले. त्यांना आपल्या जीपमध्ये बसवून त्यांना माजलगाव मार्गे अहमदनगर जिल्ह्यातील खरवंडी (ता. पाथर्डी) येथे नेले. तेथे त्यांनी सुनील शिंदे आणि त्यांच्या सहकाऱ्यांना कंपनीचे काम करायचे असेल तर दोन कोटींची खंडणी द्यावी लागेल, अशी धमकी दिली.

सुनील शिंदे आणि त्यांच्या सहकाऱ्यांनी सुटका करून घेत बुधवारी (ता. २९) केज पोलिस ठाण्यात रमेश घुले आणि त्याच्या अकरा ते बारा साथीदारांविरुद्ध अपहरण करून खंडणी मागणे व शस्त्र प्रतिबंधक कायद्यानुसार गुन्हा दाखल केला.

मुख्य संशयितास पोलिस कोठडी

गुन्हा दाखल होताच अवघ्या बारा तासांच्या आत या प्रकरणातील मुख्य संशयित रमेश घुले यास केज पोलिसांनी ताब्यात घेतले. बुधवारी (ता. २९) त्याला न्यायालयात हजर केले असता, एक जूनपर्यंत पोलिस कोठडी सुनावण्यात आली.