आष्टी (बीड): येथील कोविड हेल्थ सेंटरमध्ये उपचारांसाठी दाखल झालेल्या रुग्णांची शौचालया अभावी हेळसांड होत आहे. सेंटरमधील दोन्ही शौचालये बंद अवस्थेत असल्याने तसेच पाण्याची सोयही नसल्याने या रुग्णांना बाहेर उघड्यावर शौचविधीसाठी जावे लागत आहे. या प्रकारामुळे रुग्ण तसेच नातेवाइकांमधून संताप व्यक्त केला जात आहे.

आष्टी येथील ग्रामीण रुग्णालयाच्या जुन्या इमारतीमध्ये या रुग्णांवर उपचार करण्यासाठी कोविड हेल्थ सेंटर सुरू करण्यात आलेले आहे. या सेंटरची रुग्ण क्षमता ३० एवढी असून रुग्णांची संख्या दिवसेंदिवस वाढत असल्याने हे सेंटर सध्या अपुरे पडू लागले आहे. सध्या या सेंटरमध्ये ४० च्या आसपास रुग्णांवर उपचार सुरू आहेत. उपचारांसाठी दाखल झालेल्या रुग्णांची मात्र सोयीसुविधांअभावी मोठी हेळसांड सुरू आहे.

स्वच्छतागृहांसाठी महिला दिनी 'निषेध महाआरती'; जागतिक महिला दिनी अनोखं...

सेंटरमध्ये असलेली दोन्ही शौचालये बंद अवस्थेत आहेत. तसेच पाण्याचीही सोय उपलब्ध करून देण्यात आलेली नाही. त्यामुळे लक्षणे नसणाऱ्या, गंभीर तसेच अतिगंभीर रुग्णांनाही दुखणे विसरून बाहेर खुल्या मैदानात शौचविधीसाठी जावे लागत आहे. याबाबत रुग्णालयाच्या व्यवस्थापनाकडे वारंवार मागण्या करूनही सोय उपलब्ध करून देण्यात येत नसल्याने रुग्णांमधून संताप व्यक्त होत आहे.

अंघोळीचीही घ्यावी लागतेय 'गोळी'
लक्षणे नसणाऱ्या परंतु कोरोना अहवाल पॅझिटिव्ह आलेल्या रुग्णांना रोज पुरेसा आहार, औषधोपचार व स्वच्छता गरजेची असते. आष्टीच्या कोविड हेल्थ सेंटरमध्ये उपचारांसाठी दाखल होणाऱ्या रुग्णांसाठी अंघोळीसाठी गरम पाणी तर सोडा स्नानगृह व थंड पाणीही नाही. त्यामुळे दाखल झाल्यानंतर डिस्चार्ज होईपर्यंत उपचारांसाठी देण्यात येणाऱ्या औषधाच्या गोळ्याबरोबरच चक्क अंघोळीचीही गोळी लागत आहे.

सख्ख्या भावाने काढला सख्ख्या भावाचा काटा, तीक्ष्ण हत्याराने केला खून

कोविड हेल्थ सेंटरमधील शौचालये सध्या नादुरूस्त अवस्थेत आहेत. त्यांची दुरुस्ती करावी अथवा नवीन शौचालये तयार करावीत अशी मागणी करण्यात आली आहे. पाण्याची सोयीसाठी नगर पंचायतीशी पत्रव्यवहार झाला असून अद्याप कार्यवाही न झाल्याने रुग्णांना गैरसोयीचा सामाना करावा लागत आहे. आदेश प्राप्त होताच सर्व सोयीसुविधा उपलब्ध करून देण्यात येतील.
डॉ. राहुल टेकाडे, वैद्यकीय अधीक्षक, ग्रामीण रुग्णालय, आष्टी)