बीड - इंग्रजांच्या आणि निजामाच्या तावडीतून देशाला आणि आणि मराठवाड्याला स्वातंत्र्य मिळाले पाहिजे. मात्र, त्यानंतर अनेक सामाजिक प्रश्नांनी जन्म घेतला आणि सामाजिक दुरावाही वाढला. जिल्ह्यातील शेतकरी आत्महत्या, स्त्रीभ्रूण हत्या, बालविवाह, महिलांवरील अत्याचार व लैंगिक शोषण, बालमजुरी, ऊसतोड कामगारांचे प्रश्न आदींबाबत संवेदना जागवत सामाजिक कार्यकर्ते संध्या व दत्ता बारगजे यांनी जिल्ह्यात संवाद यात्रा सुरु केली आहे.

मराठवाडा मुक्तिसंग्राम दिनी कृषिमंत्री धनंजय मुंडे यांनी या यात्रेला हिरवा झेंडा दाखवला. दुचाकीवरून निघालेली बारगजे दांपत्याची यात्रा आता राष्ट्रपिता महात्मा गांधी यांच्या जयंतीपर्यंत (ता. दोन) जिल्हाभरातील सर्व तालुक्यांतील विविध शाळा, महाविद्यालये, शेतवस्त्या तसेच मशिदी, मंदिरांमध्ये जाणार आहे.

जाती - धर्माच्या नावावर माजलेली अराजकता निवळण्यासाठी ही चिंतन यात्रा असून तरुणांच्या शिक्षण, स्वावलंबनासाठी देखील ही यात्रा आहे. जिल्ह्यातील हिंसात्मक घटना टळाव्यात, समाजातील आपलेपणा वाढावा, स्त्री भ्रूण हत्यांच्या घटना थांबाव्यात. शेतकरी आत्महत्यांना पायबंद बसावा यासाठी बारगजे दांपत्य विविध घटकांशी संवाद साधणार आहे. तरुणांमधील नैराश्य, व्यसनाधीनता आणि मुरदाडपणा दूर व्हावा, असाही प्रयत्न केला जाणार आहे. व्यसन, अज्ञान, नैराश्य, अंधविश्वास आणि दांभिकता, चिंतेच्या खोल गर्तेत गुंतलेल्या समाजास दिशा देण्याचा मानसही बारगजे दांपत्याचा आहे.