Parali vaijyanath: शहरातील सरस्वती नदीला व ओढ्याला पाणी आल्याने सकल भागात पाणी शिरल्याने घरासह घरातील साहित्याचे मोठे नुकसान झाले असून या भागातील अनेक नागरीकांना सुरक्षित ठिकाणी हलवण्याची प्रक्रिया प्रशासनाच्या वतीने सुरू करण्यात आली आहे.

शहरातील जुन्या गावभागातून वाहणाऱ्या सरस्वती नदीला आलेल्या पुरामुळे तुळजाईनगर, नरहरी महाराज मंदिर परिसर, किर्तीनगर, गंगासागर नगर, बरकतनगरसह सरस्वती नदीच्या काठावर असलेल्या सकल भागात पाणी शिरल्याने अनेक घरांचे नुकसान झाले असून प्रशासनाच्या वतीने बरकतनगर मधील रहिवाशांना इतरत्र हलवण्याची प्रक्रिया सुरू करण्यात आली आहे. मंगळवारी (ता.०३) पहाटे पडलेल्या मुसळधार पावसामुळे जुन्या गावभागातील श्री शनी मंदिर परिसरात व अंबेवेस येथे पाणी साचले आहे.

सरस्वती नदीवर नगरपालिका प्रशासनाच्या वतीने ऐन पात्रात दुकाने काढल्याने या पात्रात मुसळधार पावसामुळे पाणी मोठ्या प्रमाणावर आले या पात्रात पाणी न बसल्याने सकल भागात पाणी शिरले व पुर परिस्थिती निर्माण झाली. यामुळे तुळजाईनगर, नरहरी महाराज मंदिर परिसर, किर्तीनगर, गंगासागर नगर, बरकतनगर परिसरातील घरात गुडघ्याच्यावर पाणी साचले होते यामुळे घरातील संसारपयोगी साहित्याचे मोठे नुकसान झाले आहे. यामुळे शहरू,शाळा महाविद्यालयाला अघोषित सुट्टी होती. नगरपालिका प्रशासन, महसूल प्रशासन घटनास्थळी दाखल झाले आहे.