बदनापूर (जि.जालना) : ना मास्क, ना सोशल डिस्टन्सिंग अशा अवस्थेत भाजपचे बदनापूरचे आमदार नारायण कुचे यांनी कार्यकर्त्याच्या लग्नात डिजेवर नृत्य केले. त्यांचा हा नृत्याचा व्हिडीओ सध्या सोशल मिडियावर तुफान व्हायरल झाला आहे.जालना जिल्ह्यात कोरोनाचा संसर्ग वाढत चालला आहे. अशा अवस्थेत सर्वांनी काटेकोरपणे कोरोना प्रतिबंधात्मक नियमांचे पालन करणे गरजेचे आहे.
मात्र कोरोना प्रतिबंधात्मक नियम ढाब्यावर बसवत मंगळवारी (ता. 16) आमदार नारायण कुचे कार्यकर्त्यांच्या आग्रहास्तव डिजेवर बेभान होऊन नाचले. अर्थात व्हिडिओत अवघे काही सेकंद आमदार नारायण कुचे नृत्य करीत असल्याचे दिसून येत आहे. मात्र नाचताना त्यांनी मास्क घातलेला नव्हता शिवाय लग्नाची वऱ्हाड असल्याने सोशल डिस्टन्सिंगचे पालन देखील त्यांच्याकडून झाल्याचे दिसत नव्हते.
हा व्हिडीओ सोशल मीडियावर व्हायरल झाल्यानंतर त्यांच्यावर नाचताना कोरोना प्रतिबंधात्मक नियमांचा विसर पडल्याची टीका होत आहे. भोकरदन तालुक्यातील लोणगाव येथील कार्यकर्त्याच्या लग्नाची वऱ्हाड उमरखेड्याला जात होती. तेव्हा तेथून जाताना उत्साही कार्यकर्त्यांनी आमदार कुचे यांचे वाहन थांबवले. तसेच त्यांना नृत्य करण्याचा आग्रह केला. तेव्हा आमदार कुचे वाहनातून खाली उतरून वऱ्हाडी मंडळींसोबत नृत्य केले होते.
लोणगाव येथील कार्यकर्त्याच्या लग्नाची वऱ्हाड वाजत-गाजत उमरखेड्याकडे जात होती. तेव्हा माझी जीप थांबवून कार्यकर्त्यांनी मला नृत्य करण्याचा आग्रह केला. सुरवातीला मी त्यांना नाहीच सांगितले. मात्र आम्हाला कार्यकर्त्यांची मर्जी सांभाळावी लागते म्हणून अवघा अर्धा मिनिट नृत्य केले. अर्थात कोरोनाची रुग्णसंख्या वाढत असल्यामुळे सर्वांनी काटेकोरपणे कोरोना प्रतिबंधात्मक नियमांचे पालन करावे, असे आवाहन करतो.
- नारायण कुचे, आमदार, बदनापूर - अंबड,
संपादन - गणेश पिटेकर
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.