जालना- नागपूरहून मुंबईकडे येणाऱ्या महामार्गावर जालन्याजवळ एका गावात भीषण अपघात झाला आहे. दोन कारचा एकमेकांना समोरा-समोर धडक बसली आणि हा दुर्दैवी अपघात झाला. जालन्याच्या कडवंची गावाजवळ समृद्धी महामार्गावरील या अपघातात सहा जणांचा मृत्यू झाला आहे, तर चार जण जखमी झाले आहेत. 'साम टीव्ही'ने यासंदर्भातील वृत्त दिलं आहे.

नागपूरवरून एक कार मुंबईकडे येत होती. यावेळी एक कार विरूद्ध दिशेने आली. त्यामुळे हा अपघात झाला असं सांगण्यात येत आहे. नागपूरवरून आलेल्या या कारमधील चार जणांचा मृत्यू झालाय, तर विरुद्ध दिशेने येणाऱ्या कारमधील दोघांचा मृत्यू झाला आहे. चार जण जखमी आहेत, यातील एकाची प्रकृती गंभीर असल्याचं समजतं आहे.

माहितीनुसार, विरूद्ध दिशेने येणारी कार ही स्थानिक लोकांची होती. ते इंधन भरण्यासाठी विरुद्ध दिशेने येत होते. याचवेळी मुंबईच्या दिशेने येणारी दुसरी कार वेगामध्ये होती. दोन्ही कारची समोरासमोर जोराची धडक बसली. अपघात अत्यंत भीषण होता, दोन्ही कारचा चेंदामेंदा झाला आहे. यात काहींचा जागीच मृत्यू झाला. जखमींना उपचारासाठी छत्रपती संभाजीनगरमधील हॉस्पिटलमध्ये दाखल करण्यात आले आहे.त्यांच्यावर उपचार सुरू असून पोलीस याप्रकरणी अधिक तपास करत आहेत.

अधिकची माहिती अशी, मुंबई नागपूर समृद्धी महामार्गावर जालना जिल्ह्यातील कडवंची पेट्रोल पंप परीसरात स्विफ्ट डिझायर कारचा भीषण अपघात शुक्रवारी (ता.२८) मध्यरात्रीनंतर घडलाय. यात तीन मृत मुंबईचे तर तीन बुलडाणा जिल्ह्यातील आहेत.

मुंबई नागपूर समृद्धी महामार्गावरील जालना शहरालगत असलेल्या कडवंची येथील पेट्रोल पंपावर इंधन भरण्यासाठी स्विफ्ट डिझायर कार गेली होती. इंधन भरल्यानंतर स्विफ्ट डिझायर कार चालकाने नागपूरच्या दिशेने समृद्धी महामार्गावर उलट्या दिशेने समृद्धी महामार्गावर प्रवेश केला. याच दरम्यान समोरून येणाऱ्या ईरटीका कारने स्विफ्ट डिझायर कारला जोराची धडक दिली. त्यामुळे कार चक्क समृद्धी महामार्गाच्या खाली जाऊन कोसळली. या अपघातात सहा जण जागीच ठार झाले आहेत.

फयाज शकील मंसुरी, फैजल शकील मंसूरी, अल्थमेश मंसूरी( सर्व रा. मालाड मुंबई), प्रदीप लक्ष्मण मिसाळ (रा. पिंपळगाव, देऊळगाव राजा), संदीप माणिक बुधवंत, विलास सुभाष कायंदे (रा.आरखेडा,देऊळगाव राजा) असे मयतांची नावे आहेत. तर शकील मंसूरी, अल्ताफ मंसूरी, राजेश कुमार व अन्य एक जण गंभीर जखमी झाला आहे. समृद्धी महामार्ग प्रादेशिक विभाग पोलिसांनी जखमींना जिल्हा सामान्य रुग्णालयात उपचारासाठी दाखल केले.