लातूर : अल्पवयीन मुलीचा विवाह सुरू असल्याची माहिती मिळताच लातूर पोलिसांचे पथक अवघ्या काही मिनिटांत चक्क लग्न मंडपात पोचले. नवरी मुलगी ही अल्पवयीन असल्याचे समजताच पोलिसांनी नवरदेवासह, दोन्ही बाजूंचे नातेवाईक, पुजारी, फोटोग्राफर, स्वयंपाकी यांच्यासह २०० वऱ्हाडी मंडळीविरुद्ध रविवारी (ता. ३०) गुन्हा दाखल केला.

पोलिस हेल्पलाइनवर (११२) शहरातील खाडगाव रस्ता परिसरात एका अल्पवयीन मुलीचा विवाह घडवून आणला जात असल्याची माहिती पोलिसांना प्राप्त झाली. पोलिसांनी तत्काळ चाइल्डलाइनच्या पदाधिकाऱ्यांना ही बाब सांगितली. पोलिस पथक लग्नमंडपात पोचले. पोलिस लग्नमंडपात दाखल झाल्याचे पाहताच काही वऱ्हाडी मंडळी भीतीने पसार झाले.

यावेळी पोलिसांनी मुला-मुलींचे नातेवाईक यांच्याकडे अधिक चौकशी केली असता वधू ही अल्पवयीन असल्याचे निदर्शनास आले. त्यानंतर पोलिसांनी वधू-वरांसह त्यांच्या नातेवाइकांना शिवाजीनगर पोलिस ठाण्यात आणले. नवरी ही अल्पवयीन असल्याचे माहिती असूनदेखील विवाह लावून दिल्यामुळे नवरदेव, दोन्ही बाजूंचे नातेवाईक,

लग्न जमवणारे, वधू-वराचे मामा, पुजारी, छायाचित्रकार, स्वयंपाकी अशा २०० वऱ्हाडी मंडळी यांच्या विरुद्ध बालविवाह प्रतिबंधक अधिनियम २००६ अन्वये शिवाजीनगर पोलिस ठाण्यात चाइल्डलाइनच्या अलका संमुखराव यांच्या तक्रारीवरून गुन्हा दाखल करण्यात आला आहे. ही कारवाई शिवाजीनगर पोलिस ठाण्याचे पथक, भरोसा सेल, दामिनी पथक, चाइल्डलाइन यांनी एकत्रितपणे केली.