भूम (जि. उस्मानाबाद): राज्य शासनाच्या कडक निर्बंधामुळे आठवडे बाजार बंद आहेत. परिणामी, शेतमाल शेतातच सडत आहे. यात सर्वाधिक नुकसान भाजीवर्गीय आणि फळपिकांचे होत आहे. त्यामुळे लाखो रुपयांचा फटका शेतकऱ्यांना बसला आहे. तालुक्यातील वांगी खुर्द येथील रामचंद्र सांगोळे यांनी दोन एकरात खरबुजाचे उत्पादन घेतले.

आता उन्हाळ्यात बाजारपेठेत खरबुजाची मागणी वाढेल, अशी आशा त्यांना होती. पण, आठवडे बाजारबंद झाल्याने खरबुजाचे भाव गडगडले. त्यामुळे शहरात ते विक्रीसाठी नेले तरी वाहतूक खर्चही निघणे अवघड असल्याने त्यांच्या शेतातील काढणीस आलेले खरबूज जागेवरच वाळत असून, त्यात त्यांनी जनावरांना चरण्यासाठी सोडले. यामुळे त्यांचे चार लाख रुपयांचे नुकसान झाले आहे.

हृदयद्रावक घटना! गोठ्याला आग लागून बारा शेळ्यांचा आगीत होरपळून मृत्यू

शिवाय कष्ट वाया गेले ते वेगळेच. श्री. सांगोळे यांचे हे नुकसान केवळ प्रातिनिधिक आहे. अशीच स्थिती इतर शेतकऱ्यांचीही आहे. टरबूज, टोमॅटो आणि इतर फळपीक, भाजीवर्गीय पिकांचे उत्पादकांनी मोठा फटका बसला आहे. गतवर्षीही नुकसान, त्यानंतर झालेली अतिवृष्टी यातून कसेबसे सावरलेल्या शेतकऱ्यांवर आता मोठे आर्थिक संकट आले आहे. 

कडक निर्बंध, वाढलेले इंधनदर यामुळे बाजारपेठे शेतमाल नेणे अवघड झाले आहेत. शेतातच खरबूज वाळत आहे. त्याचा उपयोग सध्या जनावरांच्या चाऱ्यासाठी करत आहे. राहिलेला खरबूज काढून खरिपासाठी शेतीची मशागत करणार आहे. शासनाने नुकसानभरपाई द्यावी. 
- रामचंद्र सांगोळे, शेतकरी वांगी खुर्द 
 

(edited by- pramod sarawale)