बीड : कधी अस्मानी तर कधी सुल्तानी संकटांचा सामना करणारे शेतकरी मोठ्या अडचणीत आहेत. अशा शेतकऱ्यांच्या मालवाहतूक वाहनांकडून टोल घेऊ नका, अशा सूचना खासदार बजरंग सोनवणे यांनी राष्ट्रीय महामार्ग अधिकाऱ्यांना दिल्या, तर जलजीवन मिशनद्वारे नागरिकांना पाणी देण्याचे पुण्याचे काम होत आहे. यात कोणीही पाण्यावर लोणी काढण्याचे पाप करू नये, अशी तंबीही त्यांनी दिली.

जिल्हा परिषदेत जलजीवन मिशनच्या कामांचा आढावा मंगळवारी (ता. एक) सोनवणे यांनी घेतला. यावेळी मुख्य कार्यकारी अधिकारी आदित्य जीवने यांच्यासह अधिकारी उपस्थित होते. पाणीपुरवठ्याची कामे दर्जेदार करून घ्या, कामात हयगय झाली तर कोणाचीही गय केली जाणार नाही, असा इशाराही त्यांनी अधिकाऱ्यांना दिला.

जिल्हाधिकारी कार्यालयात त्यांनी रेल्वे आणि राष्ट्रीय महामार्गांच्या कामांचाही आढावा घेतला. यावेळी निवासी उपजिल्हाधिकारी शिवकुमार स्वामी यांच्यासह अधिकारी उपस्थित होते. जलजीवन मिशन योजनेला मरगळ आलेली असून, काही ठिकाणी अर्धवट कामे करून पैसे उचलले जात असल्याचे समोर येत आहे.

यामुळे अधिकाऱ्यांनी कामे दर्जेदार करून घेण्यासाठी प्रयत्न करावेत, असेही सोनवणे म्हणाले. अहिल्यानगर-बीड-परळी रेल्वेमार्गाचे काम तत्काळ पूर्ण करा. त्यासाठी भूसंपादनाचा विषय तातडीने मार्गी लावा, अशी सूचनाही सोनवणे यांनी अधिकाऱ्यांना केली.