जाफराबाद (जि.जालना) : शहरातून (Jafrabad) माहोराकडे जाताना दुचाकी मालवाहू ट्रकवर धडकल्याने बापलेक ठार झाले, तर गर्भवतीसह तीन वर्षीय बालिका गंभीर जखमी झाले. ही घटना चिंचखेडा फाट्यावर गुरुवारी (ता.२७) दुपारी साडेचार वाजता घडली. जाफराबाद शहरातून माहोरा गावाकडे मदन पांडुरंग शेजुळ (वय ३६ रा.म्हसरुळ), गर्भवती मंदा मदन शेजुळ तसेच आकांक्षा मदन शेजुळ (वय ४ ) आणि तीन वर्षीय मुलगी अनुष्का मदन शेजुळ असे चौघेजण गुरुवारी दुपारी दुचाकीवरून जात होते. तेव्हा चिंचखेडा फाट्यावर त्यांची दुचाकी सिमेंटची वाहतूक करणाऱ्या ट्रकवर धडकली. या अपघातात गंभीर मार लागल्याने दुचाकीस्वार मदन तसेच आकांक्षा हे बापलेक जागीच ठार झाले. तर गर्भवती असलेल्या मंदा व अनुष्का या गंभीर जखमी झाल्या. (Father And Son Died In Truck Two Wheeler Accident)

जखमींना उपचारासाठी तातडीने जालन्याच्या (Jalna) सामान्य रुग्णालयात दाखल करण्यात आले, तेथे प्रथमोपचार करून औरंगाबादला हालविण्यात आले आहे. अपघाताची माहिती मिळताच पोलिस निरीक्षक रमेश जायभाये, पोलिस उपनिरीक्षक युवराज पोठरे, पोलिस हवालदार बी.टी.सहाने यांनी घटनास्थळी मदतकार्य केले, तसेच घटनेचा पंचनामा केला. तर मृत मदन व आकांक्षा यांना ग्रामीण रुग्णालयात हालविण्यात आले. तेथे डॉ.डी.एम.पाटील, डॉ.राऊत, प्रवीण रोटे, विनायक गायकवाड यांनी उत्तरीय तपासणी केली. या घटनेची जाफराबाद पोलिस ठाण्यात रात्री उशिरापर्यंत नोंद घेण्याची प्रक्रिया सुरु होती.