चाकूर, (जि. लातूर) : भरधाव मोटारीने ट्रॅक्टरला धडक दिल्यामुळे चार तरुणांचा मृत्यू, तर एक जण गंभीर जखमी झाल्याची घटना लातूर-नांदेड महामार्गावरील आष्टामोड-महाळंग्रापाटीदरम्यान रविवारी पहाटे तीनच्या सुमारास घडली. हे सर्व नांदेड येथील असून, तुळजापूरला देवदर्शनासाठी निघाले होते.

शिवराज हरिश्चंद्र लंकाढाई (वय २६), सोहन बालाजी कोतवाल (२७), लक्ष्मण राजाराम कात्रे (३३), कृष्णा मिठ्ठुलाल मंडले (२८, सर्व नांदेड) अशी अपघातात मृत्यू झालेल्यांची नावे आहेत. शुभम किशोर लंकाढाई गंभीर जखमी आहे. उसाची वाहतूक करणाऱ्या ट्रॅक्टरला रिफ्लेक्टर नव्हते. यामुळे चालकाला अंदाज न आल्याने मोटार पाठीमागून ट्रॅक्टरला धडकली असावी, असे सांगितले जाते.