अहमदपूर (लातूर): शहरातील थोडगा रोडवर कंटेनरने स्कूटीस मागील बाजूने धक्का दिल्याने सोमवार (ता.28) आजी व नातू ठार झाल्याची घटना घडली आहे. शहरातील थोडगा रोडवरील पोचम्मा नगर येथील योगेश जयराज गोरे ( 22 वर्ष) हा आपल्या आजी कमलबाई शिवराजअप्पा गोरे ( 76 वर्ष) यांना खोकला लागल्याने स्कूटीवर सकाळी दहाच्या सुमारास तपासणीसाठी जात होता.

घरापासून दोनशे फूट अंतरावरच थोडग्याकडून शहराकडे येणाऱ्या कंटेनरने योगेश गोरे याच्या स्कूटीला मागील बाजूस धक्का दिला. कंटेनरच्या समोरील चाकाखाली आजी व नातू पडल्याने अंगावर टायर गेले व दोघांचा जाग्यावरच  मृत्यू झाला आहे. अपघात झाल्या ठिकाणी अधिकची वर्दळ नसताना खुल्या रस्त्यावरील हा दुर्देवी अपघात झाला. स्कूटीचे कुठल्याही प्रकारचे नुकसान झाले नाही, परंतु आजी व नातू टायर खाली सापडल्यामुळे मृत्यू झाला.

या दुर्दैवी अपघातात आजी व नाताच्या मृत्यूने गावात हळहळ व्यक्त केली जात आहे. योगेशचे आई व वडील मागील पाच वर्षापूर्वी मोटारसायकलवरुन परचंड्याहून अहमदपूरकडे येत होते. अहमदपूरच्या जवळ आल्यावर अशाच प्रकारे कंटेनरने यांच्या मोटारसायकला धक्का दिल्याने आईचा मृत्यू झाला होता.