बीड: वाट्याने शेती करुन कुटुंबीयांची गुजराण करण्यासाठी सासुरवाडीत राहणाऱ्या एकाने बुटाच्या लेसने गळफास घेत आत्महत्या केल्याची घटना परिसरातील आहेरवडगाव येथे गुरुवारी (ता. २६) घडली. अशोक शिवराम बरडे (वय ५०, रा. पाडळी, ता. शिरूर कासार) असे आत्महत्या केलेल्याचे नाव आहे. अशोक बरडे हे आपल्या आहेरवडगाव येथील सासुरवाडीत राहत होते. त्यांनी एकाची जमीन बटाईने केली होती. गुरुवारी पहाटे त्यांनी बुटाच्या लेससच्या साहाय्याने लिंबाच्या झाडाला गळफास लावून आत्महत्या केली.

अशोक बरडे यांना दोन विवाहित मुली व दोन मुले आहेत. घटनेचे कारण अद्याप स्पष्ट नाही. घटनेची माहिती मिळाल्यानंतर बीड ग्रामीण पोलिस ठाण्याचे फौजदार देविदास आवारे, आनंद मस्के, दिनेश ढाकणे यांनी घटनास्थळी भेट देऊन पंचनामा केला. ग्रामीण पोलिस ठाण्यात आकस्मिक मृत्यूची नोंद करण्यात आली.