हिंगोली : हिंगोली ते कनेरगावनाका मार्गावर कलगाव पाटीजवळ भरधाव ट्रक व आयशर टेम्पोच्या समोरा समोर झालेल्या धडकेत तीन जण ठार तर एक जण गंभीर जखमी झाल्याची घटना सोमवारी ता. ३१ मध्यरात्री घडली आहे.

याबाबत पोलिसांनी दिलेल्या माहितीनुसार वाशीम येथून एका आयशर टेम्पो मोसंबी घेऊन नांदेडकडे निघाला होता. सदर टेम्पो हिंगोली ते कनेरगावनाका मार्गावर कलगाव पाटी जवळ आला असतांना समोरून भरधाव वेगाने येणाऱ्या ट्रकने क्रमाक आरजे २१ जीए ५५३२ टेम्पोला धडक दिली. या अपघातात ट्रकमधील दोघेही ठार झाले त्यापैकी चालकाचे नांव महेमुदखान रा.नागौर (राज्यस्थान) असून अन्य एकाचे नांव समजू शकले नाही. तर टेम्पोमधील पवन गायकवाड रा. नांदेड याचा मृत्यू झाला.

तर करण कदम हा गंभीर जखमी झाला. या अपघाताची माहिती मिळाल्यानंतर पोलिस अधिक्षक राकेश कलासागर, सहाय्यक पोलिस अधिक्षक यतीश देशमुख यांच्या मार्गदर्शनाखाली उपाधिक्षक विवेकानंद वाखारे , हिंगोली ग्रामीण पोलिस ठाण्याचे निरीक्षक आर.एन. मळघने , उपनिरीक्षक श्री. मुपडे , सहाय्यक पोलिस उपनिरीक्षक विठ्ठल भडंगे रवीकांत हरकाळ, आकाश पंडीतकर,अशोक धामणे यांच्या पथकाने घटनास्थळी धाव घेऊन जखमी किरण यास उपचारासाठी हिंगोलीच्या शासकिय रुग्णालयात दाखल केले. मात्र त्याची प्रकृती गंभीर असल्याने प्राथमिक उपचार करून नांदेडला हलविले आहे .

या अपघातामुळे हिंगोली ते कनेरगावनाका मार्गावरील वाहतुक विस्कळीत झाली होती . पोलिसांनी रात्रीच क्रेन बोलावून वाहने रस्त्याच्या बाजूला केल्यानंतर वाहतुक सुरळीत झाली . याप्रकरणी पोलिस ठाण्यात नोंद झाली नाही तर ट्रकमधील एका मयताची ओळख पटविण्याचे काम सुरु असल्याचे पोलिसांनी सांगितले.