सिडको - शिवनेरी कॉलनी, एन-९ परिसरात ३६ वर्षीय अशोक दत्तू दळवे यांनी गळफास घेत आत्महत्या केल्याचा प्रकार बुधवारी (ता. सात) पहाटे चार वाजता उघडकीस आला. अशोकने पत्नी आणि सासरच्या मंडळीच्या मानसिक त्रासाला कंटाळून आत्महत्या केल्याचा आरोप अशोकच्या वडिलांनी केला आहे. याप्रकरणी अशोकची पत्नी, सासू-सासरे आणि मेहुण्याविरुद्ध सिडको पोलिस ठाण्यात आत्महत्येस प्रवृत्त केल्याप्रकरणी गुन्हा दाखल करण्यात आला आहे.

याप्रकरणी दत्तू दळवे (वय ६५ रा. कानडी बदन, ता. केज, जि. बीड) यांनी दिलेल्या तक्रारीचा आशय असा-दळवे यांचा मोठा मुलगा अशोकचा विवाह २०११ मध्ये एन सात, अयोध्यानगर येथील पूजा सोळुंके हिच्यासोबत झाला होता. लग्नानंतर अशोक आणि पूजा छत्रपती संभाजीनगरात राहायला आले होते.

काही महिन्यांनी अशोकने वडिलांना पत्नीचे बाहेर प्रेमसंबंध असल्याचे सांगितले होते. यामुळे अशोक आणि त्याच्या वडिलांनी पूजाच्या माहेरी जाऊन तिला समजावले होते. यानंतर अशोक आणि पूजाला दोन मुले झाली. २०२२ मध्ये अशोकने पुन्हा वडिलांना पूजाचे बाहेर प्रेमसंबंध सुरूच असून, मी तिच्या घरी समजावायला गेलो असता मला सासू-सासरे आणि मेहुण्याने मारहाण करीत बाहेर हाकलल्याचे सांगितले. वडिलांनी त्याला गावाकडे राहण्यास ये असे सांगितले असता त्याने ती मुले माझ्याकडे ठेवत नाही. माहेरी जाते, मला जगण्याची इच्छा नाही असे सांगितले होते.

दरम्यान, ५ ऑगस्टला पूजाने सासऱ्यांना कॉल करून, पतीचे आणि माझे भांडण झाले असून मी माहेरी आली आहे. जोपर्यंत तुम्ही शहरात येत नाही तोपर्यंत मी नांदायला येणार नाही असे सांगितले. ता.६ ऑगस्टला दत्तू दळवे आणि त्यांची पत्नी छत्रपती संभाजीनगरात आले. एन सात येथे पूजाच्या माहेरी जाऊन त्यांनी भेट घेतली.

मात्र, पूजा सासरी येण्यास तयार झाली नाही. दळवे हे मुलगा अशोकच्या रूमवर आले. घडलेला प्रकार त्यांनी अशोकला सांगितला. यावेळी अशोक हा संतापला होता. रात्री साडेबारा वाजता तिघे झोपल्यानंतर पहाटे चार वाजता अशोकने गळफास घेत आत्महत्या केली. दत्तू दळवेंच्या तक्रारीवरून पत्नी पूजा, सासू सुरेखा हनुमंत साळुंके, सासरा हनुमंत साळुंके, मेहुणा अभिजित साळुंके यांच्याविरुद्ध गुन्हा दाखल करण्यात आला आहे.