घनसावंगी : तालुक्यातील तळेगाव येथे शेळ्या चारण्यासाठी गेलेल्या किशोरवयीन दोन मुला-मुलीचे शुक्रवारी (ता.२१) सकाळी तलावात मृतदेह आढळले. अभिजित भारत येडे (वय १७) आणि अर्चना संजय भालेराव (१५) अशी मृतांची नावे आहेत. त्यांचा पोहताना मृत्यू झाला की हा घातपात आहे, याचा तपास पोलिस करीत आहेत.

अभिजित आणि अर्चना हे गुरुवारी शेळ्या चारण्यासाठी गेले होते. सायंकाळी पाचच्या सुमारास शेळ्या घरी आल्या. मात्र, दोघे घरी आले नाहीत. त्यामुळे नातेवाइकांनी त्यांचा शोध घेतला; पण ते कुठेही आढळून आले नाहीत.

दरम्यान, शुक्रवारी सकाळी तलावाच्या शेजारी त्यांचा शोध घेतला. तलावात चपला तरंगताना दिसल्या. त्याच ठिकाणी पाणी पिण्याची बॉटलही दिसून आली. नातेवाइकांनी गळ टाकून शोध घेतल्यावर मृतदेह सापडले. अभिजित दहावीत नापास झाल्याने शाळेत जात नव्हता. अर्चना सातवीत शिकत होती. अंबड पोलिस पोलिस ठाण्यात आकस्मिक मृत्यूची नोंद झाली.