बदनापूर (जिल्हा जालना) - बदनापूर तालुक्यात मराठा आरक्षणाचा प्रश्न पेटला आहे. मराठा आरक्षणाबाबत शासन वेळकाढू धोरण राबवित असल्याने मराठा समाज आक्रमक आंदोलने करीत आहेत. तालुक्यातील बाजार गेवराई - कडेगाव पाटीवर दोन्ही गावातील मराठा समाज बांधवांनी सोमवारी (ता. ३०) दुपारी तासभर रास्ता रोको आंदोलन केले.

यावेळी समाज बांधवांनी आंदोलनस्थळी टायर जाळून आपला रोष व्यक्त केला. यावेळी 'एक मराठा लाख मराठा', 'आरक्षण आमच्या हक्काचे', 'मनोज जरांगे हम तुम्हारे साथ है' अशा गगनभेदी घोषणा देत अवघा आसमंत दणाणून सोडला. या आंदोलनात बाजार गेवराई आणि कडेगाव येथील मराठा समाज बांधव मोठ्या संख्येने सहभागी झाले होते.

तब्बल तासभर चाललेल्या या आंदोलनामुळे जालना - छत्रपती संभाजीनगर महामार्गवरील वाहतूक काहीकाळ ठप्प झाली होती. रास्ता रोकोची माहिती मिळताच बदनापूरचे पोलिस निरीक्षक सुदाम भागवत आणि पोलिस कर्मचाऱ्यांचे पथक घटनास्थळी पोचले. आंदोलकांनी त्यांना निवेदन सादर केल्यानंतर रास्ता रोको मागे घेतला.