अनिरुद्ध धर्माधिकारी

Latest Crime News: धर्म परिवर्तन करण्यासाठी दबाव टाकून पोलीस खात्यातील पत्नीचा शारीरिक व मानसिक छळ केला, तसेच पैसे दे नाहीतर तलाक दे असे म्हणून नंतर परस्पर दुसरे लग्न केल्या प्रकरणी आष्टी येथील व्यावसायिकाच्या मुलासह कुटुंबातील सातजणांवर आष्टी पोलीस ठाण्यात गुन्हा दाखल करण्यात आला आहे.

याबाबत पिडीत महिलेने फिर्याद दिली असून, त्यावरून पती सोहेल लैकुद्दिन काजी, सासरा लैकुद्दिन मोहम्मद काझी, सासू रझियाशाहिन लैकुद्दिन काझी, चुलत सासू राफियाशाहिन काझी ( राणाबाजी), नणंद आफिया काझी व मेहविश काझी तसेच पतीची दुसरी पत्नी आयशा शेख (सर्व रा. शनीचौक, आष्टी) यांच्यावर गुन्हा दाखल करण्यात आला आहे.

फिर्यादीत म्हटले आहे की, ता. 11 ऑक्टोबर 2018 रोजी स्पेशल मॅरेज अॅक्ट या कायद्यानुसार आमचा विवाह झाला. त्यावेळी मी माझ्या धर्माने राहणार व ते त्याच्या धर्माने राहणार असे ठरले होते. लग्नाच्या काही दिवसापर्यंत पती माझ्यासोबत धर्माच्या बाबतीत काही बोलला नाही. परंतु नंतर धर्मावरून छळ करण्यास सुरुवात केली.

सोहेल हा सिदपूर (गुजरात) येथे बँकेत नोकरीस होता, तर फिर्यादी या नागपूर येथे पोलीस विभागात नोकरीस होत्या. बँकेतील अफरातफरीच्या प्रकरणात पतीला 13 सप्टेंबर 2021 रोजी सस्पेंड करण्यात आले. त्यावेळी आम्ही दोघे गुजरात येथे राहत होतो. ऑक्टोबर 2021 रोजी मुलगा झाला. त्यानंतर पती कोणत्या ना कोणत्या कारणावरुन नेहमी भांडणतंटा करू लागला.

प्रसूतीच्या सहा दिवसानंतर मला मारहाण केली. मे 2022मध्ये पतीच्या नाकाच्या शस्त्रक्रियेसाठी सासरा, सासू, नणंद सर्वजण आष्टीतून गुजरात येथे आले. तेथे तू मुस्लिम नसल्याने आमच्यामध्ये राहू शकत नाही. त्यामुळे तुला आम्ही मान्य करणार नाही अशा नेहमी धमक्या देत असत. लेकरु जरी झाले तरी मी तुझा संसार होऊ देणार नाही. तू मला कधी मान्य नाहीस आणि मी तुझा घटस्फोट होण्यास भाग पाडेल. तू माझ्या मुलाला सोड असे म्हणून सासूने अश्लील शिवीगाळ केली.

तू हिला सोडून दिले नाही तर तुला आम्ही प्रॉपर्टी देणार नाही व घरातून बेदखल करु अशा धमक्या कुटुंबीय पतीला देत असल्याने त्यांच्या सांगण्यावरून पती भांडण व मारहाण करीत असे. त्यामुळे दोघे विभक्त राहू लागले. एक-दोन वेळेस दोघांमध्ये समेटाचे प्रयत्न झाले. परंतु पतीच्या वर्तनात सुधारणा झाली नाही. सासू-सासरे नेहमी तुला आमच्या मुस्लिम रितीरिवाजाप्रमाणे राहावे लागेल. तुला मुस्लिम धर्म स्वीकारावा लागेल. तू असे केले नाहीस तर आम्हाला तू मान्य नाहीस. तू धर्म परिवर्तन केले नाही तर तुला आमच्या घरात तसेच माझ्या मुलाच्या आयुष्यात स्थान नाही व तुला माझ्या मुलाला तलाक द्यावा लागेल अशी धमकी देून मानसिक व शारीरिक त्रास देण्यास सुरुवात केली.

पतीही फिर्यादीला नेहमी तू पोलीस खात्यात नोकरीला आहेस तर मी तुझ्या नोकरीवर गदा आणेन. तुझ्या मागे चौकशी लावेन. मी सस्पेंड झाल्यामुळे तुलाही सस्पेंड करेन. तुला सुखाने जगू देणार नाही व जर तू माझा धर्म स्वीकारला नाही तर मी तुला तलाक देईन. माझ्या धर्मात चार लग्न करण्यास परवानगी आहे.

त्यामुळे मला तुझी गरज नाही तसेच वारंवार पैशाची मागणी करुन पैसे दे नाहीतर तलाक दे असे म्हणून छळ केला, तसेच फिर्यादीच्या परस्पर दिनांक 2 ऑगस्ट 2024 रोजी आयशा शेख हिच्याशी लग्न केले असे फिर्यादीत म्हटले आहे. या फिर्यादीवरून सातजणांवर गुन्हा दाखल करण्यात आला आहे.