बीड : नगर पंचायत निवडणुकीच्या निकालात बुधवारी (ता. १९) जिल्ह्यात मातब्बरांना धक्का बसला. राष्ट्रवादी काँग्रेसचे जिल्हाध्यक्ष व जिल्हा परिषदेचे उपाध्यक्ष बजरंग सोनवणे यांच्या कन्या डॉ. हर्षदा सोनवणे यांना पराभव पत्करावा लागला. जनविकास आघाडीच्या आशाबाई कराड जायंट किलर ठरल्या.

केज नगर पंचायतीची निवडणुक रंगतदार झाली. भाजपच्या आमदार नमिता मुंदडा मतदार संघाचे प्रतिनिधित्व करतात. तरीही या नगर पंचायत निवडणुकीपासून भाजप चार हात दुर होते. मात्र, हारुण इनामदार यांच्या नेतृत्वाखालील जनविकास आघाडीला भाजपनेते रमेश आडसकर यांनी पाठबळ दिले. दरम्यान, या ठिकाणी काँग्रेस, जनविकास आघाडी व राष्ट्रवादी काँग्रेसमध्ये प्रमुख लढत झाली. शिवसेनेही रिंगणात होती. या ठिकाणी धक्कादाय निकाल लागून आघाडीने सर्वाधिक आठ जागा जिंकल्या तर कॉंग्रेसला तीन जागांवर समाधान मानावे लागले.

राष्ट्रवादी काँग्रेसचे जिल्हाध्यक्ष बजरंग सोनवणे यांच्या नेतृत्वाखाली पक्षाने मागच्या निवडणुकीपेक्षा सरस कामगिरी केली. मात्र, त्यांच्या डॉक्टर कन्या डॉ. हर्षदा सोनवणे यांना पराभव पत्करावा लागला. डॉ. हर्षदा सोनवणे एमबीबीएसच्या अंतिम वर्षात पुण्याला शिकतात. या महिनाअखेर त्यांची परीक्षा आहे. ओबीसी प्रवर्गासाठी राखीव जागांवरील आरक्षण रद्द झाल्याने स्थगित झालेल्या या चार जागांवरील निवडणुकीवेळी श्री. सोनवणे यांनी कन्येला निवडणुक रिंगणात उतरविले होते.