मराठा आरक्षणप्रश्नी अंतरवाली सराटी (ता.अंबड,जि. जालना) येथे उपोषणाला बसलेल्या मनोज जरांगे-पाटील यांची प्रकृती काल खालावली होती. त्यांच्या उपोषणाचा आज पाचवा दिवस आहे. काल वैद्यकीय उपचार, सलाईन लावण्यास त्यांनी वैद्यकीय पथकाला नकार दिला. सगेसोयऱ्यांबाबतच्या निर्णयाची अंमलबजाणी व्हावी, आंदोलकांवरील गुन्हे मागे घ्यावेत यासह अन्य मागण्यांवर ते ठाम आहेत.

मध्यरात्री उशिरा मनोज जरांगे यांना ग्रामस्थांनी, डॉक्टर पथकांनी आग्रह केल्यामुळे मध्यरात्री अडीच ते तीन वाजण्याच्या सुमारास वैद्यकिय उपचार, सलाईन चालू करण्यात आली आहे.

मनोज जरांगे आपल्या उपोषणावर ठाम आहेत, मंगळवार ता.11 रोजी डॉक्टरांच्या पथकांनी जरांगे यांना उपचाराची गरज असल्याचे सांगितले होते, नवनिर्वाचित खासदार संदीपान भुमरे यांनी देखील भेट घेऊन उपचार घेण्याची विनंती जरांगे यांना केली होती. आपल्या मागणीवर सरकार सकारात्मक निर्णय घेणार आहे असे सांगितले होते.

जरांगे यांचा बी.पी.शुगर, कमी होत आहे. त्यांना उपचाराची गरज आहे असे वैद्यकिय अधिकारी डॉक्टर अनिल वाघमारे, जालना जिल्हा आरोग्य अधिकारी डॉ. जयश्री भुसारे यांनी सांगितले होते, या बाबत ग्रामस्थांनी मनोज जरांगे यांना विनंती, आग्रह केला व त्या नंतर सकाळपर्यंत एक सलाईन लावण्यात आली आहे.

मध्यरात्री बार्शीचे आमदार राजेंद्र राऊत यांनी जरांगे यांची भेट घेतली. जरांगे यांच्या मागणी बाबत सरकारने तोडगा काढावा करीता उपमुख्यमंत्री देवद्र फडणवीस यांच्या सोबत फोनवर चर्चा केली असल्याची माहिती आहे.