जिंतूर : एक दिवसाच्या विश्रांतिनंतर मंगळवारी दुपारी साडेतीननंतर शहर व परिसरात मेघगर्जनेसह ४५ मिनिटे जोराचा पाऊस झाला. त्यानंतरही काहीवेळ रिमझिम सुरूच होती.पाच सप्टेंबरपासून तालुक्यातील आठही मंडळात रोज पाऊस जोरदार पाऊस पडत आहे.

सोमवारी एक दिवस पावसाने विश्रांती घेतली. तोच मंगळवारी पुन्हा पाऊस झाला. शहरातील रस्त्यांवरून पाणी वाहून गेले. अचानक आलेल्या पावसामुळे काहीवेळ शहरातील जनजीवन विस्कळीत झाले होते. भाजीपाला विक्रेते, पथारीवाले यांची चांगलीच तारांबळ उडाली.

ग्रामीण भागात ओढ्या-नाल्यांना पूर आला होता. शेतीच्या कामांना व्यत्यय आला. शहरात नगरपरिषदेची पाणीवितरण व्यवस्थेचे वेळापत्रक कोलमडले असल्याने नागरिकांना नियमित पाणीपुरवठा होत नाही. त्यामुळे अनेकांनी सांडपाण्यासाठी पावसाच्या पाण्याचा उपयोग घेत पाणी साठवून ठेवले.