गंगाखेड : तालुक्यातील ग्रामीण भागातील विद्यार्थी मोठ्या प्रमाणात गंगाखेड शहरात शिक्षणासाठी येतात. परंतु, राज्य परिवहन महामंडळातर्फे मध्यंतरी ग्रामीण भागातील बंद करण्यात आलेली बससेवा अद्याप सुरू करण्यात आली नाही. या पार्श्वभूमीवर अखिल भारतीय विद्यार्थी परिषदेच्या वतीने आगार प्रमुखांना निवेदन देण्यात आले आहे.

महाराष्ट्र राज्य परिवहन महामंडळातर्फे ग्रामीण भागात बस सुविधा उपलब्ध करून देण्यात आली आहे. परंतु, ग्रामीण भागातून शाळेच्या वेळेत शालेय विद्यार्थ्यांना शहरात येण्यासाठी बस सुरू करण्यासोबतच गंगाखेड ते दामपुरी मार्गे अहमदपूर बस सेवा सुरू करण्यात यावी, गंगाखेड ते पिंपळदरी मार्गे किनगाव बस सेवा सुरू करावी. गंगाखेड ते पिंपळदरी बस सेवा सुरू करावी आदी मागण्या निवेदनाद्वारे करण्यात आल्या आहेत. निवेदनावर अखिल भारतीय विद्यार्थी परिषदेच्या शहर मंत्री वैष्णवी अनावडे यांच्यासह अनेक विद्यार्थ्यांच्या स्वाक्षऱ्या आहेत.