संसदेत बुधवारी (१३ डिसेंबर) रोजी घुसखोरी करण्यात आल्याच्या प्रकाराने सर्वत्र खळबळ उडाली होती. संसदेत घुसखोरी करणाऱ्यांमध्ये मराठवाड्यातील लातूरचा थरुण अमोल शिंदे हा देखील होता. दरम्यान आता अमोलच्या आई वडिलांची प्रतिक्रिया समोर आली आहे. मुलगा अटकेत असल्याने दोघे चिंतेत असून पोलिसांची चौकशीमुळे त्रस्त झाले आहेत.

पोलिसांच्या चौकशीमुळे त्यांना मजुरीसाठी देखील जाता येत नाहीये, अशा परिस्थितीत त्यांनी अमोलशी संपर्क करुन द्या अन्यथा आम्ही जीवन संपवू इशारा दिला आहे.

संसदेमध्ये घुसखोरी करून गदारोळ करणारा अमोल शिंदे हा लातूर जिल्ह्यातल्या चाकुर तालुक्यातील झरी बुद्रुक गावचा आहे. त्याला पोलिसांनी ताब्यात घेतल्याची माहिती मिळताच त्याच्या आई-वडिलांना मोठा धक्का बसला आहे. दरम्यान गेल्या ४ दिवसांपासून आपल्या मुलाशी संपर्क होत नसल्याने, आता अमोल शिंदे यांच्या आई वडिलांची चिंता वाढली आहे. साम टिव्हीने याबद्दल वक्तव्य केलं आहे.

शेवटचा पर्याय म्हणून फोनवर भेट झाली तर ठिक, नाहीतर लातुरच्या कलेक्टर ऑफिसला जाऊ, आपल्या जीवाचं काहीतरी करू. आता जगून तरी काह फायदा असं अमोलचे वडिल म्हणाले. दररोज दारात पोलीस असल्याने कुणी त्यांना मजुरीला देखील बोलवत नाही. त्यामुळे जगायचं कसं? असा प्रश्न देखील त्यांच्यासमोर उभा राहिला आहे, असं अमोल शिंदे याच्या वडिलांनी म्हटलं.

बुधवारी संसद सभागृहाच्या कामकाजादरम्यान सागर शर्मा आणि मनोरंजन डी नावाच्या दोन तरुणांनी प्रेक्षक गॅलरीतून उडी मारली होती. यावेळी त्यांनी सभागृहात धुराच्या कांड्या देखील फोडल्या त्यामुळे लोकसभेत धूर पसरला होता. त्याचवेळी अन्य दोन आरोपी नीलम आणि शिंदे यांनीही संसदेबाहेर घोषणाबाजी करत धुर सोडला होता.